Yange Mose hemen Mbaiserael anyom kpishi nga karen yô, zurum u una kpe. Nahan Yehova kaa a na ér: ‘A lu we u nyôr a ior av Mbaiserael ken Tar u Ityendezwa ga. Kpa me tese u tar shon, u nenge.’ Mose maa kaa a Yehova ér a tsua orhemen ugen, nana nengen sha ior. Tsô Yehova kaa a na ér: ‘Za hen Yosua, za kaa a na wer, ka un m tsua ye.’

Tsô Mose ôr ikyurior la ér zurum u una kpe, shi pase ve ér ka Yosua Yehova a tsua un ér a hemen ve a nyôr a ve ken Tar u Ityendezwa la ye. Mose gema kaa a Yosua ér: ‘De cian ga. Yehova una wase u.’ Ica kera gba ga maa Mose hide unde sha Uwo u Nebo, Yehova za tese un tar u yange tôndo zwa ér una na Aberaham, man Isaka man Yakob la. Mose yange tsa kuma anyom 120 cii mase kpen ye.

Tsô Yehova kaa a Yosua ér: ‘Per Ifi u Yordan, yem ken Kanaan. Me wase u vough er yange m wase Mose nahan. Nôngo tsung ôron atindi a am hanma iyange. De cian ga. Taver ishima. Za, za er kwagh u m kaa mer er yô.’

Yosua maa tindi mbamkerev uhar ken gar u Yeriko. Se va  seer fan kwagh u yange za hemen ken Yeriko yô, ken ityough ki ki dondo la. Mbamkerev mbara mba za hiden yô, ve va kaa ér i de timbir u nyôron ken Kanaan ga. Kpernan maa Yosua kaa a ikyurior la ér ve mough hen ape ve haa afo la. Tsô a kaa a upristi mba ve tôô areki u ikyuryan la ér ve za hii hungwan shin Ifi u Yordan. Ifi la yange va mngerem poo shi lu kuan sha agee. Kpa upristi mbara mba hungwan angahar shin mngerem mara je maa, ifi shon cii de u kuan, shi mngerem uma! Upristi mbara maa hungwa za tile hen atô atô sha taregh inyaagh, zan zan ikyurior i Iserael cii hungwa per yande la. U hen wer yange ivande ne umbur ve kwagh u Yehova vande eren shin Zegemnger u Nyian laa?

Anyom 40 la nga been yô, Mbaiserael mase za nyôron ken Tar u Ityendezwa la. Lu ijiir i vea fatyô u maan uya vev kua ugeri, shi vea kaha iyiav man ishule i wain kua ishule i ikyon igen. Shi lu tar u atumbabua man iyough ngee ker kpishi yô.