Hili hono taki ʻe Mōsese ʻa e puleʻanga ʻIsilelí ʻi he ngaahi taʻu lahi, naʻe ofi ki he ngataʻanga ʻo ʻene moʻuí. Naʻe tala ange ʻe Sihova kiate ia: ‘ʻOku ʻikai ko koe ʻa e toko taha te ke fakahū ʻa e kau ʻIsilelí ki he Fonua ʻo e Talaʻofá. Ka te u tuku ke ke sio ʻi he fonuá.’ Naʻe kole leva ʻe Mōsese kia Sihova ke ne fili ha taki foʻou ke ne tokangaʻi ʻa e kakaí. Naʻe pehē ange ʻe Sihova kiate ia: ‘ʻAlu kia Siosiua, ʻo tala ange kiate ia ko ia ʻa e toko tahá.’

Naʻe tala ʻe Mōsese ki he kakaí ʻokú ne mei mate pea kuo fili ʻe Sihova ʻa Siosiua ko e toko taha ia te ne taki kinautolu ki he Fonua ʻo e Talaʻofá. Pea naʻe pehē ʻe Mōsese kia Siosiua: ‘ʻOua te ke ilifia. ʻE tokoniʻi koe ʻe Sihova.’ Taimi nounou mei ai, naʻe ʻalu hake ʻa Mōsese ki he tumutumu ʻo Moʻunga Nipó, ʻa ia naʻe fakahaaʻi ange ai ʻe Sihova kiate ia ʻa e fonua naʻá Ne talaʻofa kia ʻĒpalahame, ʻAisake, mo Sēkopé. Naʻe taʻu 120 ʻa Mōsese ʻi heʻene maté.

Naʻe tala ʻe Sihova kia Siosiua: ‘Kolosi ʻi he Vaitafe Sioataní, ʻo hū ki Kēnani. Te u tokoniʻi koe ʻo hangē pē ko ʻeku tokoniʻi ʻa Mōsesé. Fakapapauʻi ke ke lau ʻa ʻeku Laó ʻi he ʻaho kotoa pē. ʻOua te ke ilifia. Loto-toʻa. ʻAlu ʻo fai ʻa e meʻa kuó u fekauʻi koe ke ke faí.’

 Naʻe fekauʻi atu ʻe Siosiua ha ongo asiasi ʻe toko ua ki he kolo ko Sielikoó. ʻI he talanoa hono hokó, te tau ako ai ʻa e meʻa lahi ange fekauʻaki mo e meʻa naʻe hoko aí. ʻI heʻena foki maí, naʻá na fakahaaʻi ko e taimi lelei ia ke nau hū ai ki Kēnani. ʻI he ʻaho hono hokó, naʻe tala ai ʻe Siosiua ki he kakaí ke nau veteki ʻa e ʻapitangá. Naʻá ne fekauʻi leva ʻa e kau taulaʻeiki naʻa nau fua ʻa e puha ʻo e fuakavá ke nau ʻalu muʻomuʻa ʻi he Vaitafe Sioataní. Naʻe tafe mālohi ʻa e vaitafé. Ka ʻi he pā pē ʻa e vaʻe ʻo e kau taulaʻeikí ki he vaí, naʻe tuʻu ʻa e tafe ʻa e vaitafé pea naʻe maha ʻa e vaí! Naʻe luelue ʻa e kau taulaʻeikí ʻi he kilisitahí pea nau tuʻu ʻi loto-mālie lolotonga ia naʻe kolosi ʻa e kakai kotoa ʻo ʻIsilelí ki he tafaʻaki ʻe tahá. ʻOkú ke pehē naʻe fakamanatu kiate kinautolu ʻe he mana ko ení ʻa e meʻa naʻe fai ʻe Sihova ʻi he Tahi Kulokulá?

Hili ʻa e ngaahi taʻu kotoa ko iá, naʻe faifai pē pea hū ʻa e kau ʻIsilelí ki he Fonua ʻo e Talaʻofá. Naʻe lava ke nau langa ai ha ngaahi fale mo ha ngaahi kolo. Naʻe lava ke nau tō ha ngaahi ngoue, ngaahi ngoue kālepi mo e ngaahi ngoue fuaʻiʻakau. Naʻe fonu ʻi he fonuá ʻa e huʻakau mo e hone.