Musa naakamana kubasololela bana Israyeli kwamyaka minji, buumi bwakwe bwakali kuya kumamanino. Jehova wakamwaambila kuti: ‘Tolinduwe uuyoosololela bana Israyeli Munyika Yakasyomezyegwa. Pesi ndilakutondezya nyika eeyo.’ Mpoonya Jehova wakaambila Musa kuti asale musololi mupya kutegwa asololele bantu. Jehova wakamwaambila kuti: ‘Koya kuli Joshua, alimwi ukamwaambile kuti ngonguwe uuyoobasololela bantu.’

Musa wakaambila bana Israyeli kuti walo wakali afwaafwi kufwa alimwi akuti Jehova wakasala Joshua kuti nguuyoobasololela mu Nyika Yakasyomezyegwa. Mpoonya Musa wakaambila Joshua kuti: ‘Utayoowi pe. Jehova unookugwasya.’ Kakutanainda ciindi cilamfwu, Musa wakaunka atala aa Cilundu ca Nebo, ooko Jehova nkwaakamutondezya nyika eeyo Leza njaakasyomezya Abrahamu, Izaka, alimwi a Jakobo. Musa wakali amyaka iili 120 ciindi naakafwa.

Jehova wakaambila Joshua kuti: ‘Kozabuka Mulonga wa Jordano akuunka ku Kanana. Ndinookugwasya mbubwenya mbondakamugwasya Musa. Weelede kunoobala Mulawo wangu abuzuba. Utayoowi pe. Koyuma. Koya ukacite nzyondakulailila.’

 Joshua wakatuma basikutwela bobilo kumunzi wa Jeriko. Muciiyo citobela, tuyakwiiya zinji kujatikizya icakacitika ookuya. Nobakapiluka, bakaamba kuti eeci cakali ciindi cibotu cakuti baunke ku Kanana. Buzuba ibwakatobela, Joshua wakaambila bantu kuti balibambile lweendo. Mpoonya wakaambila bapaizi ibakali kunyamuna bbokesi lyacizuminano kuti bainde kumbele kutozya ku Mulonga wa Jordano. Mulonga ooyu wakalizwide kapati. Pele maulu aabapaizi mbwaakalyatila buyo mumaanzi, maanzi akaleka kweenda kumane akayuminina. Bapaizi bakaunka akati kamulonga akwiima, mpoonya bana Israyeli boonse bakazabuka kuya mutala. Sena uyeeya kuti maleele aaya tanaakabayeekezya ncaakabacitila Jehova ku Lwizi Lusalala?

Inzya, noyakamana myaka yoonse eeyo, bana Israyeli bakanjila Munyika Yakasyomezyegwa. Lino bakali kukonzya kuyaka maanda alimwi aminzi. Bakali kukonzya kuba amyuunda yamisaansa alimwi amyuunda yazisamu zyamicelo. Yakali nyika iikunka buci amukupa.