Ja Moisés waj tejkʼanubʼal jitsan jabʼil ja bʼa chonabʼ Israel, sok ja wego ojxta chamuk. Ja Jyoba yala yabʼ: «Mi weʼn oj wa ochuk ja israʼelenyoʼik ja bʼa Luʼum Kʼapubʼali. Pe ojni ka wil ja luʼumi». Anto, ja Moisés skʼanayi ja Jyoba bʼa oj stsaʼ jun tejkʼanubʼal bʼa oj stalnay ja israʼelenyoʼiki. Ja Jyoba sjakʼa: «Leʼa ja Josué sok alayabʼ yeʼn ja maʼ jtsaʼuneji».

Ja Moisés yala yabʼ ja chonabʼ bʼa ojxta chamuk. Jaxa Jyoba stsaʼata ja Josué bʼa yeʼn oj yiʼoch ja chonabʼ ja bʼa Luʼum Kʼapubʼal. Anto, ja Moisés yala yabʼ ja Josué: «Mok xiwan. Ja Jyoba oj skoltaya». Mi albʼi mas, ja Moisés kʼe ja bʼa mas chaʼan ja bʼa wits Nebo. Masan tiw, ja Jyoba sjeʼayi ja luʼum skʼapunejyi ja Abrahán, ja Isaac soka Jacob. Ja Moisés ayiʼoj 120 jabʼil yajni chami.

Ja Jyoba yala yabʼ ja Josué: «Kʼutsu ja yok jaʼ Jordán sok ochan ja bʼa Canaán. Keʼn oj koltaya, jastalni jkoltay ja Moisés. Mok chʼayuka kʼujol skʼumajel kʼakʼu kʼakʼu ja jLeyi. Mok xiwan, tʼilan oj ajyan tsats. Kaʼax sok kʼulan spetsanil ja jas kalatawabʼi».

 Ja Josué sjeka chabʼ tsʼelsatinum bʼa chonabʼ Jericó. Ja bʼa pilan sjejeli oj jnebʼtik mas jastik ekʼ ja tiw. Yajni ja tsʼelsatinumik kumxiye, yalawe jani sjutsʼinil jaw ochel ja bʼa Canaán. Ja bʼa pilan kʼakʼu, ja Josué yala yabʼ ja chonabʼ a-stul-e ja bʼa wane jijlel. Tixa sjeka bʼa yok jaʼ Jordán ja sacerdoteʼik matik yiʼoje ja arka bʼa trato. Jelni bʼutʼel ja jaʼi, pe yajni ja sacerdoteʼik sbʼatawe ja jaʼi, kʼot tekʼan sok taki. Anto tixa ochye ja bʼa yojoli jach takin ay. Yajni kʼotye ja bʼa snalani, ti kanye tiw masan ja chonabʼ Israel skʼutsuwe. Yajni yilawe ja milagro it, ¿jul maʼ skʼujole ja jas skʼulan ja Jyoba ja bʼa mar Rojo?

Yajni ekʼta jitsan jabʼil, ja israʼelenyo masan kʼotye ja bʼa Luʼum Kʼapubʼali. Ja wego ojxani bʼobʼ yawe kʼeʼuk naʼitsik sok chonabʼik. Yaʼteltajel alaj, yalajil tsʼusubʼ sok stsʼunjel tuk jasunuk. Kʼotelni jun luʼum bʼa ay lech sok chabʼ.