Inap planti yia Moses i lidim ol Israel, na klostu nau em bai i dai. Jehova i tokim em: ‘Yu no dispela man bai bringim ol Israel i go insait long Graun Bilong Promis. Tasol mi bai larim yu lukim dispela graun.’ Bihain Moses i askim Jehova long makim nupela lida bilong lukautim ol Israel. Jehova i tokim Moses: ‘Go long Josua, na tokim em olsem em bai stap hetman.’

Moses i tokim ol Israel olsem klostu em bai dai na Jehova i makim Josua olsem hetman long lidim ol i go long Graun Bilong Promis. Moses i tokim Josua: ‘No ken pret. Jehova bai helpim yu.’ Bihain liklik long dispela, Moses i go antap long het bilong Maunten Nebo, na Jehova i soim em graun Em i bin promis long Abraham, Aisak, na Jekop. Moses i gat 120 krismas taim em i dai.

Jehova i tokim Josua: ‘Brukim Wara Jordan, na go long Kenan. Mi bai helpim yu olsem mi bin helpim Moses. Yu mas ritim gut Lo bilong mi long olgeta de. No ken pret. Strongim bel. Go na mekim samting mi bin tokim yu long mekim.’

 Josua i salim tupela spai i go long taun Jeriko. Long neks stori, yumi bai kisim save moa long samting i kamap long hap. Taim ol i kam bek ol i tok, nau em gutpela taim long go long Kenan. Long neks de, Josua i tokim ol manmeri long rausim kem. Bihain em i salim ol pris i karim Bokis Kontrak long i go pas long Wara Jordan. Wara i tait. Tasol taim ol pris i putim lek long wara, wara i no tait moa na i go daun! Ol pris i wokabaut i go sanap long ples drai namel long wara na ol Israel i wokabaut i go long narapela sait. Yu ting dispela mirakel i kirapim ol long tingim samting Jehova i bin mekim long Solwara Retsi?

Bihain long olgeta dispela yia, nau ol Israel i stap long Graun Bilong Promis. Ol inap wokim ol haus na taun. Ol inap wokim ol gaden, gaden wain, na planim ol prut diwai. Em graun i gat planti milk na hani.