Mozesi wakaŵa pafupi kufwa wati walongozga mtundu wa Israyeli vyaka vinandi. Yehova wakamuphalira kuti: ‘Ndiwe yayi unjirenge na Ŵaisrayeli mu Charu cha Layizgano. Kweni nikuzomerezgenge kuti uchiwone waka.’ Pamanyuma Mozesi wakapempha Yehova kuti wasankhe munthu munyake kuti walongozge ŵanthu. Yehova wakati kwa Mozesi: ‘Luta kwa Joshuwa, ukamuphalire kuti ndiyo walongozgenge ŵanthu.’

Mozesi wakaphalira Ŵaisrayeli kuti iyo wali pafupi kufwa, ndipo Yehova wasankha Joshuwa kuti waŵalongozge na kukanjira mu Charu cha Layizgano. Mozesi wakati kwa Joshuwa: ‘Ungawopanga yayi. Yehova wakovwirenge.’ Pamanyuma, Mozesi wakakwera pachanya pa phiri la Nebo apo Yehova wakamulongora charu icho wakalayizga Abrahamu, Yisake, na Yakhobe. Mozesi wakafwa wali na vyaka 120.

Yehova wakati kwa Joshuwa: ‘Yambuka Yorodani, na kunjira mu Kenani. Nikovwirenge nga umo nkhawovwilira Mozesi. Nyengo zose ukwenera kuŵazga Dango lane. Ungawopanga yayi. Uŵe na chikanga. Luta ukachite ivyo nakuphalira.’

 Joshuwa wakatuma mwachibisibisi ŵanalume ŵaŵiri kuti ŵakendere muzi wa Yeriko. Mu mutu wapanthazi apa, tisambirenge ivyo vikachitika ŵanalume aŵa ŵati ŵafika ku Yeriko. Ŵati ŵawerako kukendera muzi uwu, ŵakaphalira Joshuwa kuti ni nyengo yiwemi yakuti ŵalutire ku Kenani. Machero ghake, Joshuwa wakaphalira Ŵaisrayeli kuti ŵapakire katundu wawo na kwambapo ulendo. Pamanyuma, wakatuma ŵasembe awo ŵakanyamuranga likasa la phangano kuti ŵadangire kuluta ku dambo la Yorodani. Ŵati ŵafika, ŵakasanga dambo la Yorodani lazura. Kweni ŵasembe ŵakati ŵakhwaska waka maji gha mu Yorodani, maji ghakaleka kwenda, ndipo ghakakamuka. Ŵasembe ŵakayimilira pa malo ghakomira pakatikati pa Yorodani. Apo ŵachali kwimilira, mtundu wose wa Israyeli ukayambuka pa mtunda wakomira kuluta ku sirya linyake. Munthondwe uwu ukwenera kuti ukakumbuska Ŵaisrayeli ivyo Yehova wakachita pa Nyanja Yiswesi. Ni nthena yayi?

Pati pajumpha vyaka, Ŵaisrayeli ŵakanjira mu Charu cha Layizgano. Ŵakamba kuzenga nyumba na matawuni. Ŵakamba kulima, kupanda mpheska, na vipasi. Chikaŵa charu cha kwenda mkaka na uchi.