Израиль чонну хөй чылдар ишти башкарып келген Моисейге ооң өлүрүнүң мурнунда: «Израильчилерни аазаан черимче сен киирбес сен. Ынчалза-даа ол черни сеңээ көргүзер мен» — деп, Иегова чугаалаан. Моисей чоннуң дугайында сагыш човаар чаа баштыңны шилип алырын Иеговадан дилээн. Иегова аңаа: «Нуннуң оглу Иисусче баргаш, ону шилип алдым деп аңаа чугаала» — дээн.

Моисей израильчилерге дамчыткан: «Чок апаарымга, силерни Нуннуң оглу Иисус улаштыр баштаар». Оон Моисей Нуннуң оглу Иисусту: «Кортпа, Иегова сеңээ дузалажыр!» — деп бүзүреткен. Соонда Моисей Нево дагже үне бергеш, Иегованың Авраамга, Исаакка, Иаковка өнчү кылдыр аазаан черин көрген. Моисей 120 харлыында чок апарган.

Иегова Нуннуң оглу Иисуска чугаалаан: «Иордан хемни кешкеш, Ханаанче бар. Моисейге ышкаш, сеңээ база дузалажыр мен. Хүннүң-не мээң Хоойлумну номчуп тур. Кортпа, эрес-дидим бол. Мээң чугаалаан бүгү чүүлүмнү күүсет».

 Нуннуң оглу Иисус Иерихон хоорайже ийи хайгыылчыны чоргузупкан. Дараазында эгеде аңаа чүү болганын көөр бис. Олар чедип келгеш, Ханаанче барып болур деп чугаалаан. Дараазында хүн Нуннуң оглу Иисус израильчилерге орукче үнер бис дээн. Чагыг-керээ аптаразын көдүрүп алган өргээ бараалгакчыларын ол чоннуң мурнунга тургузуп каан. Иордан хем эриктерин ажыр үерлей берген болган. Өргээ бараалгакчылары сугже базыптарга, хем акпайн баргаш, кургай берген! Олар бүгү чон хемниң өске эриинче кеже бээрин манап, хемниң ортузунга туруп алган. Чүү деп бодаар сен, олар Кызыл далайга Иегованың кылган хуулгаазынын сактып келген бе?

Ам-на хөй чылдар эрткенде, израиль чон Иегованың аазаан, ары-чигири биле сүт агып чыдар черинге чедип келген. Олар аңаа бажыңнар, хоорайлар тудуп, шөлдерге тараа, виноград, янзы-бүрү чимистерлиг ыяштарны тарып ап болур турган.