Te Moisés bayal jaʼbil la swol te nasion yuʼun Israel, maʼyukix bayal kʼajkʼal ya xkuxin. Jich albot yuʼun te Jehová: “Mame jaʼukat ya awikʼ ochel te israeletik ta Kʼinal te Albil skʼoplal ya yichʼike. Pero ya kakʼbat awil te lumkʼinale”. Jich yuʼun, te Moisés la skʼanbey Jehová te yakuk stsa jtul yachʼil jwolwanej swenta ya skanantay te lume. Te Jehová jich la sutbey: “Kʼopona te Josué sok albeya te jaʼ yichʼoj tsaele”.

Te Moisés la scholbey yaʼiy te lum te nopol ya xlajixe sok te jaʼ tsabil yuʼun Jehová te Josué swenta jaʼ ya x-ikʼotik bael ta Kʼinal te Albil skʼoplal ya yichʼike. Jich yuʼun te Moisés la yalbey te Josué: “Mame xiwat. Te Jehová yame skoltayat”. Jun cheb kʼajkʼal ta patil, te Moisés mo bael kʼalalto ta stoyolil te wits Nebo, teyto akʼbot yil yuʼun Jehová te lumkʼinal te jamal la yalbey te ya yakʼbey te Abraham, Isaac sok te Jacob. Te Moisés ayix 120 yaʼbilal-a te kʼalal laje.

Te Jehová la yalbey te Josué: “Kʼaxan bael ta mukʼul jaʼ Jordán sok ochan ta Canaán. Joʼon ya jkoltayat, jich bitʼil la jkoltay te Moisese. Mame xchʼay ta awoʼtan skʼoponel ta jujun kʼajkʼal te Ley kuʼune. Mame  xiwat, yame skʼan ayuk yip awoʼtan. Baan, pasa spisil te bin la kalbat ta mantale”.

Te Josué la stikun bael chaʼtul jtsajtaywanejetik ta lum Jericó. Ta yan aʼiyej yato jnoptikxan te bintik kʼot ta pasel tey-ae. Te kʼalal sujtik tal ta Jericó te jtsajtaywanejetike, la yalik te yorailix te ya skʼan ya x-ochik bael ta Canaán. Ta yan kʼajkʼal, te Josué la yalbey te nasion te akʼa sjachik te skampamentoike. Jaʼ nail la stikun bael ta mukʼul jaʼ Jordán te sacerdoteetik te yichʼojik te arka yuʼun chapbilkʼop. Kʼax nojel-a te mukʼul jaʼe, pero te kʼalal la yotses yokik te sacerdoteetik ta yutil jaʼe, kom ta beel sok takij. Jich yuʼun te sacerdoteetik kajik ta beel jaʼto kʼalal kʼotik ta yolil. Te kʼalal tey ayikix-ae, tey jilik-a jaʼto kʼalal kʼaxik ta yan jejch te israeletike. Kʼalal la yilik te milagro-abi, ¿julbal ta yoʼtanik ya akuy te bin la spas Jehová ta mar Rojoe?

Bayal jaʼbil ta patil, te israeletik kʼotik ta Kʼinal te Albil skʼoplal ya yichʼike. Jich yuʼun ya xjuʼ ya spasix snaik sok mukʼul lumetik. Ya xjuʼ ya stsʼunik awal tsʼunubil, tsʼusubiltik sok bok-itajetik soknix jaʼ jpam lum te banti ay leche sok chab.