Mose wa songuila epata lia Isareli vokuenda kuanyamo alua kuenje cilo omuenyo waye u panda kesulilo. Yehova wo sapuila hati: ‘Ove haveko o ka iñisa va Isareli Vofeka Yohuminyo. Pole, ngecelela okuti o mola ofeka yaco.’ Noke Mose wa pinga ku Yehova oco a nõle omunu ukuavo okuti o songuila va Isareli. Yehova wo sapuila hati: ‘Kuende ku Yehosua kuenda u sapuila okuti eye o nõliwa.’

Mose wa sapuila omanu okuti eye ndopo o laika oku fa kuenda Yehova wa nõla Yehosua oco a va songuile Vofeka Yohuminyo. Noke Mose wa sapuila Yehosua hati: ‘Ku ka kuate usumba. Yehova oku kuatisa.’ Noke yovina evi, Mose wa londa kilu liomunda yi tukuiwa hati, Nevo. Komunda yaco, Yehova wo lekisa ofeka a likuminyile oku eca ku Avirahama, Isake kuenda Yakoba. Mose wa fa eci a kuata 120 kanyamo.

Yehova wa sapuila Yehosua hati: ‘Yoka Olui Yordão kuenda iñila vofeka yo Kanana. Ame ndu ku kuatisa ndeci nda kuatisa Mose. Tanga ovihandeleko viange oloneke viosi. Ku ka kuate usumba. Kuata utõi. Kuende kuenda linga ovina nda ku handeleka.’

 Yehosua wa tuma olondavululi vivali vofeka yo Yeriko. Vocipama cikũimo tu ka lilongisa vali catiamẽla kovina via pita vofeka yaco. Eci ovo va tiuka, va lombolola okuti ya kala otembo yiwa yoku iñila vofeka yo Kanana. Keteke lia kuamamo, Yehosua wa sapuila omanu oco va tunde vocilombo. Kuenje wa tuma ovitunda vina via kala oku ambata ocikasia covisila oco vi pite kovaso oku enda Kolui Yordão. Olui lueyukile calua, pole, eci olomãhi viovitunda vina viambata ocikasia ca Yehova, via wila vovava, ovava aco a kotuiwa, kuenje ovava ana a tunda konano a talama! Ovitunda via enda toke vokati kolui posi ya kukuta kuenje via talama pocitumãlo caco, osimbu va Isareli vosi va yokila kesinya likuavo. O tava hẽ okuti ocikomo eci ca va ivaluisa ovina Yehova a va lingila Vokalunga Kakusuka?

Kaliye va Isareli va iñila Vofeka Yohuminyo noke yanyamo alua. Ovo va laikele oku tunga olonjo kuenda alupale. Va laikelevo oku kuata ovapia, oviumbo viayuva kuenda viapako akuavo. Vofeka yaco, mua kala asenjele alua kuenda owiki.