Nga murahu ha u ranga phanḓa lushaka lwa Isiraele miṅwaha minzhi, Mushe o vha e tsini na u fa. Yehova a amba nae a ri: ‘A si inwi ane a ḓo dzhenisa Vhaisiraele Shangoni ḽo Fulufhedziswaho. Fhedzi ndi ḓo ni tendela u ri ni ḽi vhone.’ Nga zwenezwo, Mushe a humbela Yehova uri a khethe murangaphanḓa muswa ane a ḓo ṱhogomela vhathu. Yehova a ri khae: ‘Iyani kha Yoshua nahone ni mu vhudze uri ndi ene o khethiwaho.’

Mushe a vhudza lushaka uri u ḓo fa hu si kale nahone Yehova o khetha Yoshua uri a vha range phanḓa u vha isa Shangoni ḽo Fulufhedziswaho. Nga murahu Mushe a vhudza Yoshua a ri: ‘Ni songo ofha. Yehova u ḓo ni thusa.’ Nga u ṱavhanya nga murahu ha zwenezwo, Mushe a gonya kha ṱhodzi ya Thavha ya Nebo, henefho Yehova a mu sumbedza shango ḽe a fulufhedzisa Abrahamu, Isaka na Yakobo. Mushe o fa e na miṅwaha ya 120.

Yehova a vhudza Yoshua a ri: ‘Welani Mulambo wa Yorodane nahone ni dzhene Kanana. Ndi ḓo ni thusa samusi ndo thusa Mushe. Itani vhungoho ha uri ni a vhala Mulayo wanga ḓuvha ḽiṅwe na ḽiṅwe. Ni songo ofha. Ivhani na tshivhindi. Tshimbilani ni yo ita zwine nda khou ni vhudza.’

 Yoshua a ruma ṱholi mbili muḓini wa Yeriko. Kha mafhungo a tevhelaho, ri ḓo guda zwo engedzeaho uri ho itea mini henefho. Musi ṱholi dzi tshi vhuya, dzo amba uri ndi tshifhinga tsho teaho tsha uri vha dzhene Kanana. Nga ḓuvha ḽi tevhelaho, Yoshua a vha vhudza uri vha athulule madennde. Nga murahu a vhudza vhotshifhe vhe vha vha vho hwala mbulungelo ya mulanga uri vha range phanḓa vha tsele Mulamboni wa Yorodane. Mulambo wo vha wo ḓala vhukuma. Fhedzi nga u ṱavhanya musi milenzhe ya vhotshifhe i tshi tou kanda maḓi, mulambo u si tsha elela nahone maḓi a xa! Vhotshifhe vha tshimbila vha swika vhukati ha mulambo nahone vha ima henefho musi lushaka lwoṱhe lwa Vhaisiraele lu tshi khou wela mulambo. Naa ni humbula uri honoho vhuṱolo ho vha humbudza zwe Yehova a zwi ita Lwanzheni Lutswuku?

Nga murahu ha miṅwaha minzhi, Vhaisiraele vho fheleledza vho swika Shangoni ḽo Fulufhedziswaho. Zwino vha nga kona u fhaṱa dzinnḓu na dziḓorobo. Vha nga wana tsimu dza u lima, dza nḓirivhe na dza mitshelo. Ḽo vha ḽi shango ḽi elaho mafhi na mutoli.