Mosesy nitariky Isarely tan̈atiny taon̈o maro. Izikoa izy efa hofoaty, Jehovah nivolan̈a taminany: ‘Tsy anao olo hitariky Israelita amy Tany Nampan̈antinain̈y. Fa anao ndraiky ambelako hitazan̈a tany io.’ Mosesy baka tio niangavy Jehovah hifidy olo hafa hitariky Israelita aby io. Ho Jehovah taminany: ‘Mindao volàn̈a amy Josoa, fa izy olo nifidiko.’

Mosesy nivolan̈a taminy Israelita fa tsy ela izy hofoaty, ke Josoa olo nifidiny Jehovah hitariky iro hiditry amy Tany Nampan̈antinain̈y. Nivolan̈iny Mosesy tamy Josoa: ‘Aza mavozo fa han̈ampy anao Jehovah.’ Tsy ela tafaranizen̈y Mosesy nandeha nanonga tan̈abony Bongo Nebo. Tan̈y izy nirahiny Jehovah nitazan̈a tany nampan̈antinainy Abrahama ndreky Isaka, baka io Jakoba. Naty Mosesy baka tio. Izy tamy zen̈y 120 taon̈o.

Jehovah nivolan̈a tamy Josoa: ‘Mindao mitsaka Ten̈aranony Jordana, baka io midira a Kanana. Zaho han̈ampy anao, karaha nataoko nan̈ampy Mosesy. Fa vakia isanadra Lalàn̈anaka. Aza mavozo fa zay raha irahiko ataonao fo ataova.’

 Nandefa pitsikilo aroe nandeha amy tanànany Jeriko Josoa. Amy tantara man̈araka atsika hahita ino raha nataondro tan̈y. Iro koa fa nimpody tamy Josoa tan̈y, iro nivolan̈a: ‘Efa izioty edy fotoan̈a ten̈a mety hidiran̈a a Kanana ao.’ Nirahiny Josoa nandeha vahoaka koa fa kiaka andra. Tondraka mare Ten̈aranony Jordana tamy zen̈y. Nalefany Josoa nandeha talohanolo jiaby pisoron̈o nilanja Vata misy fifan̈ikian̈a. Niaraka vitindro nikasiky rano io, tsy nandeha eky rano io. Baka io nahairitry raha io. Nitsangana tan̈ivondrano tio pisoron̈o aby io, fa vahoakany Isaely jiaby nitsaka tan̈ila. Asa tsaroanao fa Jehovah efa nan̈ano raha mira zen̈y koa tamy Ranomasin̈y Mena?

Ela ny ela ke navy tamy Tany Nampan̈antinain̈y eky Israelita aby io! Nan̈amboatra tran̈o ndreky tanàna iro tan̈y, baka io nanan̈a saha ndreky taniny rezain, avio tany feno kakazo mamoa. Ten̈a feno ronono ndreky antely ankitin̈y tany io.