Mose ali asigele panandi kuwa, Yehofa ŵamsalile kuti, ‘Nganim’ŵasoni mundu jucacajinjisya Ayisalayeli mu Cilambo ca Cilanga. Nambope cinamlosye cilamboco.’ Sambano Mose ŵam’ŵendile Yehofa kuti asagule mundu jwacacilongolela ŵanduwo. Yehofa ŵamsalile kuti, ‘Mjawule kwa Yoswa mkamsalile kuti jwalakwe ni jucaciŵa jwakwalongolela.’

Mose ŵasalile Ayisalayeli kuti jwalakwe asigele panandi kuwa soni kuti Yehofa asagwile Yoswa kuti ŵalongolele kwinjila mu Cilambo ca Cilanga. Mose ŵamsalile Yoswa kuti, ‘Mkatenda woga. Yehofa cacimkamucisya.’ Kaneko Mose ŵakwesile mu Litumbi lya Nebo, kwele Yehofa ŵamlosisye cilambo cele ŵatesile cilanga kwa Abulahamu, Isaki, soni Yakobo. Mose ŵawile ali akwete yaka 120.

Yehofa ŵamsalile Yoswa kuti, ‘Mjomboce Lusulo lwa Yolodani, ni mjawule ku Kanani. Cinjimkamucisya mpela munatendele ni Mose. Mlolecesye kuti mkuŵalanga Malamusi gangu lisiku lililyose. Mkatenda woga soni mlimbe mtima. Mjawule mkatende yanamlamwile.’

 Yoswa ŵatumisye ŵakusonda ŵaŵili ku msinda wa Yeliko. Mungani jakuyicisya tucilijiganya yejinji yayatendekwe kweleko. Paŵawusile ŵakusonda ŵala, ŵasasile kuti jaliji ndaŵi jambone jakwawula ku Kanani. Lisiku lyakuyicisya, Yoswa ŵasalile Ayisalayeli kuti asame m’masakasa gawo. Kaneko ŵasalile ŵambopesi ŵaŵanyakulaga libokosi lya cilangano kuti alongole kwawula ku Lusulo lwa Yolodani. Lusulolu lwaliji lwegumbale mesi. Nambo sajo sya ŵambopesiwo pasyagambile kukwaya mesigo, mesi ga m’lusulomo galesile kwenda kaneko gajumwile. Ŵambopesiwo ŵajesile nikuja kwima pasikati pa lusulopo, mpaka Ayisalayeli wosope ali ajombwece. Ana mkuganisya kuti cakusimonjesya celeci cakumbwisye jemanjaji yaŵatesile Yehofa Panyasa Jecejewu?

Pali pamasile yaka yejinji, Ayisalayeli ŵajinjile mu Cilambo ca Cilanga. Ŵataŵile nyumba soni misinda. Ŵalimile migunda ja yisogosi. Caliji cilambo cakwenda mkaka ni uci.