Moiseseʼ yaʼab años tu nuʼuktaj u kaajil Israel, chéen baʼaleʼ tsʼoʼok kaʼach u chʼíijil yéetel taʼaytak u kíimil. Jéeobaeʼ tu yaʼalajtiʼ: ‹Maʼ teech kan oksik le israelitaʼob teʼ luʼum tin waʼalaj in tsʼáaiktiʼoboʼ. Chéen baʼaleʼ yaan in chaʼik a wilik le luʼum jeʼeloʼ›. Moisés túuneʼ tu kʼáataj tiʼ Jéeoba ka u yéey juntúul máax ka u nuʼukt yéetel ka u kanáant le kaajoʼ. Jéeobaeʼ tu yaʼalajtiʼ: ‹Tʼaanen yéetel Josué yéetel aʼaltiʼ letiʼ le máax tsʼoʼok in yéeyikoʼ›.

Moiseseʼ tu yaʼalaj tiʼ le kaajoʼ letiʼeʼ jach taʼaytak u kíimil, yéetel Jéeobaeʼ tsʼoʼok u yéeyik Josué utiaʼal u nuʼuktoʼob teʼ Luʼum Aʼalaʼan u Tsʼaʼabaltiʼoboʼ. Moisés túuneʼ tu yaʼalaj tiʼ Josué: ‹Maʼ a chʼaʼik saajkil. Jéeoba kun áantkech›. Maʼ úuch tiʼ lelaʼ, Moiseseʼ naʼak tu puʼukil Nebo. Desde teʼeloʼ, Jéeobaeʼ tu yeʼesajtiʼ le luʼum u yaʼalmaj u tsʼáaik tiʼ Abrahán, Isaak yéetel Jacoboʼ. Moiseseʼ yaan 120 años tiʼ ka kíimi.

Jéeobaeʼ tu yaʼalaj tiʼ Josué: ‹Kʼáatmáans le río Jordanoʼ yéetel ooken Canaán. Yaan in wáantikech jeʼex úuchik in wáantik Moiseseʼ. Ilawil a xokik sáamsamal baʼax ku yaʼalik in Ley. Maʼ a sajaktal mix u péek a wóol. Xeen yéetel beet tuláakal le baʼax tsʼoʼok in waʼaliktechoʼ›.

 Josueeʼ tu túuxtaj kaʼatúul máakoʼob utiaʼal u chʼúuktikoʼob u kaajil Jericó. Teʼ tuláakʼ xookoʼ yaan k-kanik uláakʼ baʼaloʼob úuchiʼiʼ. Le ka suunaj le máakoʼoboʼ, tu yaʼaloʼobeʼ jach u yorail u yokloʼob tu luʼumil Canaán. Ka sáaschajeʼ, Josueeʼ tu yaʼalaj tiʼ le kaaj unaj u líiʼskubaʼob utiaʼal u lukʼloʼob teʼ tuʼux jelekbaloʼoboʼ. Yáaxeʼ tu túuxtaj teʼ río Jordán le sacerdoteʼob bisik u cofreil le pactooʼ. Le ríooʼ jach chuup kaʼachi, chéen baʼaleʼ le ka tu yoksaj u yook le sacerdoteʼob ichiloʼ, u jaʼileʼ joʼopʼ u yéemel tak ka tikinchaji. Le sacerdoteʼoboʼ káaj u xíimbaloʼobiʼ. Le ka kʼuchoʼob chúumukeʼ, waʼalajoʼob tak ka máan tuláakal le israelitaʼob tuláakʼ u tséel le Jordanoʼ. Le ka tu yiloʼob le milagroaʼ, ¿kʼaʼajtiʼob wa ta tʼaan le baʼax tu beetaj Jéeoba teʼ Chak Kʼáaʼnáaboʼ?

Ka máan yaʼab añoseʼ le israelitaʼoboʼ ookoʼob teʼ Luʼum Aʼalaʼan u Tsʼaʼabaltiʼoboʼ. Beoraaʼ jeʼel u páajtal kaʼach u líiʼskoʼob najoʼob yéetel kaajoʼobeʼ. Jeʼel u páajtal xan u beetkoʼob u paakʼaloʼobeʼ. Teʼ luʼum tsʼaʼabtiʼoboʼ, yaan yaʼab baʼal utiaʼal jaantbil yéetel utiaʼal ukʼbiliʼ, le oʼolal kʼuch kʼaj óoltbil bey luʼum tuʼux ku tuul leche yéetel kaabeʼ.