I kare ma lurot-piny gucito i boma me Jeriko, gin gubedo i gang pa dako mo ma nyinge Rakab. Kabaka me Jeriko oniang ni lurot-piny gitye kunnu ci ooro lumony me cito i gang pa Rakab. Rakab okano lurot piny aryo-nu i wi ode ci ocwalo lumony magi gucito woko i yo mapat. En owaco bot lurot piny-nyi ni: ‘Abikonyowu pien angeyo ni Jehovah tye ka lweny piwu dok wubiloyo lobo-ni. Wukwonge bota ni wubilaro jo me pacowa.’

Lurot piny-nyi guwaco bot Rakab ni: ‘Wacikke boti ni pe tye dano mo me paconi ma binongo awano.’ Guwacce ni: ‘Twe tol makwar i wang diricani, ci in ki jo me pacowu ducu wubibwot.’

Rakab okonyo lurot piny-nyi me lor piny ki i wang ot kun gitiyo ki tol. Gin gucito gukanne i kin godi pi nino adek ka dong gudok cen bot Yocwa. I ngeye, jo Icrael gungolo Kulu Jordan ci guyubbe me leyo lobo meno. Jeriko aye obedo boma  ma gukwongo turone. Jehovah owaco botgi ni myero gudore kun gilworo boma man kicel nino ducu pi nino abicel. I nino me abirone, gulworo boma man tyen abiro. Ka dong lulamdog gukuto tumgi, ci lumony gudange matek ki kerogi ducu. Cel me Jeriko omuk opoto woko piny! Ento ot pa Rakab, ma onongo tye i kor cel-li pe opoto. Rakab ki jo me ode gubwot pien ni en ogeno Jehovah.