Kinde ma julib ario mir Israel gitundo i Yeriko, giwok gimondo i ot pa dhaku moko ma nyinge Rahab. Saa m’ubimo mi Yeriko winjo lembene, eoro basuda yo pa Rahab. Rahab ukanu julib iwi ot man eoro basuda m’ubino sayugi i yo mange. Ewacu ni julibne kumae: ‘Abikonyowu kum ang’eyo nia Yehova ni kudwu, man nia wubimaku ng’om maeni. Akwayuwu, wung’ol ira nia wubibodho jufwa.’

Julib uyero ni Rahab kumae: ‘Wang’olo iri nia gin moko mbe ma bitimo ng’atu m’ubedo i ot peri keni.’ Gimedo kumae: ‘Twii thol ma kwar i madriza mi ot peri, e jupewu biboth.’

E Rahab uluro julib ku thol kud i wang’ madriza nitundo i ng’om. Gicidho iwi got man gipondo kuca bang’ adek, kan i ng’eye gidok i bang’ Yocuwa. I ng’eye, nyithindho mir Israel gikadhu Kulo Yordan man giyikiri pi nimaku Yeriko. Yeriko ubino adhura ma kwong’a ma gimaku. Yehova ung’olo nia gidhok  adhurane wang’ acel kubang’ nindo, ke pi nindo abusiel. I nindo mir abiro, gidhoko adhurane wang’ abiro. E julam gikudho agwara man basuda gikok ku dwandgi ma tek mandha. Gang’kidi mir adhura ugam urwombere! Ento ot pa Rahab m’ubino malu iwi gang’kidi urwombere ngo. Rahab ku jupagi giboth pilembe eketho genogen pare iwi Yehova.