Исраилли кәшфијјатчылар Әриһа шәһәринә ҝедәндә Раһаб адлы гадынын евиндә галырлар. Әриһа шәһәринин падшаһы бундан хәбәр тутуб, Раһабын евинә әсҝәрләр ҝөндәрир. Раһаб бу ики кәшфијјатчыны дамда ҝизләдир, сонра исә әсҝәрләри башга тәрәфә јөнәлдир. О, кәшфијјатчылара дејир: «Мән сизә көмәк едәҹәм, чүнки Јеһованын сизинлә олдуғуну вә бу шәһәри әлә кечирәҹәјинизи билирәм. Нә олар, сөз верин ки, мәнә вә аиләмә хәтәр јетирмәјәҹәксиниз».

Кәшфијјатчылар Раһаба дејирләр: «Сөз веририк, евиндә оланлара зәрәр дәјмәјәҹәк. Гырмызы кәндири пәнҹәрәјә бағла, беләҹә аилән хилас олаҹаг».

Раһаб кәшфијјатчылары иплә пәнҹәрәдән ашағы дүшүрүр. Онлар дағлара ҝедиб, үч ҝүн орада ҝизләнирләр. Сонра исраиллиләр Иордан чајыны кечиб, шәһәри зәбт етмәјә һазырлашырлар. Әриһа исраиллиләрин зәбт етдији илк шәһәр олур. Јеһова онлара дејир ки, алты ҝүн, ҝүндә  бир дәфә шәһәрин әтрафында долансынлар. Једдинҹи ҝүн исә онлар шәһәрин әтрафында једди дәфә доланырлар. Сонра каһинләр шејпур чалыр, әсҝәрләр исә нәрә чәкир. Бу заман шәһәрин диварлары учур! Анҹаг Раһабын дивара битишик олан еви саламат галыр. Јеһоваја ҝүвәндикләри үчүн Раһаб вә аиләси сағ галыр.