Fafisu manpaf risuru sura sumamfasis mnu Yerikho, suḇarek ro bin oso ḇenir ḇe Rakhab rum ḇyedi. Raja Yerikho ifawi roi ine ma iwan sordade ḇyesya fa skoraḇe Rakhab rum ḇyedi. Rakhab iyokef manpaf risuru ansuya ro rum ḇyeja boya ma iwan sordade anskoya fa skora ḇe moḇ ḇese. Rakhab ikofen ḇe manpaf ansuya, ’Na yafnoḇek mu snar yafawi Yahwe ryous mko ma nari mkofrur kafyo sup ine. Muḇeasas ḇe aya nari mkofaspar kina yesi.’

Manpaf risuru ansuya sukofen ḇe Rakhab, ’Nuḇeasas, nari ḇero kina besi kam sismai fasaspar. Fesepen kabrai ḇerik ro kekḇir ro rum beja, ma nari kina besi kam sisma payamyum.’

Rakhab iwan manpaf ansuya suḇuk kabrai fa suḇukiyado murḇaḇ roro kekḇir anya. Suraḇe bon ma suyokef su ro diwa ro swaf ras rikyor, ramnai sukaḇer ḇe Yosua i. Mura, snonkaku Israel simbranuk Warḇeki Yordan ma sifasos si fa  sikafyo sup ani. Yerikho iso mnu ḇerandak sifrur kafyoi. Yahwe iwan si fa simbran yaryar mnu ani rarwan oser ro ras oser ro swaf ras riwonem. Ro ras ḇefik ya, simbran yar mnu ani rarwan rifik. Ramnai imam sya siwuf trompet sena, ma sordade ansi sar naba kaku. Inja ayar karui ani imbroḇen! Ḇape, Rakhab rum ḇyeja ḇero ayar karui ani dores pdef. Rakhab ma kina ḇyesya sismai fasaspar snaro sikyar faro Yahwe I.