Sanga mata-mata kalak Israel lawes ku Jeriho, erberngi kalak e i rumah diberu si gelarna Rahap. Kepeken ieteh raja Jeriho kalak e i je, nce isuruhna tentera ku rumah Rahap. Ibunikenna mata-mata e datas loteng, nce isuruhna tentara-tentara e ku ingan si salah. Kenca si e, nina Rahap me man mata-mata e, ‘Mari kusampati, kueteh nge maka Jahwe si nampati kena. Kena nge kari si ngeruntuhken negeri enda. Tapi erjanji lebe kena bangku maka aku ras keluargaku banci selamat.’

Nina mata-mata e, ‘Ue, erjanji kami, ise pe si lit bas rumahndu la kena kai pe.’ Nce, ikataken kalak e, ‘Iketkenndu saja tali megara enda i jendelandu gelah keluargandu banci selamat.’

Dua mata-mata e nusur arah rumah Rahap make tali e. Telu wari kalak e cebuni i gunung sope lenga ijumpaina Josua. Kenca si e, kalak Israel ngelewati Lau Jordan janah ersikap guna naluken taneh e. Jeriho eme kota si pertama italukenna. Isuruh Jahwe kalak e erbaris-baris ngkelilingi Jeriho enam wari dekahna, sekali sada wari. Tapi bas wari pepituken, ikelilingina kota e pitu kali. Nce, itiup imam-imam terompetna. Tentera-tentera pe ersurak alu megang, dungna runtuh me kota e! Tapi rumah Rahap, si lit i duru tembok, la runtuh. Perban tek Rahap man Jahwe, ia ras keluargana selamat.