Éyoñe beloé si Josué a nga lôm be kuiya Jéricho, be nga nyiine nda minga éziñ a to jôé na Rahab. Éyoñe njô bôte ya Jéricho a nga wô’ô de, a nga lôme bezimbi nda Rahab na be ke bi be. Rahab a nga solé be andile ya nda jé; ve a nga kate bezimbi na, ba te tyii zene fe. Éyoñ bezimbi be keya, a nga jô beloé si na: ‘Ma volô mia amu ma yeme na Yéhôva a ne ngame jenan, a na, mia ye tyame tisone jangan. Éngôngo, bo’ané ma ngaka’a na, mia ye nyii nda bôte jam.’

Ane beloé si be nga jô nye na: ‘Ane Zambe a vee, môt ase a ye bo nda jôé été, a ye ke wu. Tiñeti’i évele nkol e vundu wôé, a nda bôte jôé ja ye nyiñ.’

Nde Rahab a nga tiñeti nkole vundu, asu na beloé si be sis. Be nga taté beta sobô minkôle tañe melu melal, ôsusua na ba bulane be Josué. Éyoñ éte bon b’Israël be nga taté na ba dañe Jourdain, a kômesane na, ba ke nyoñe Si ya Ntiñetan. Jéricho a  mbe tison ôsu be nga nyoñ a ngul. Yéhôva a nga jô be na, be tyiñelane nlam, atyiñelane da môs ôse, tañe mimôse misaman. Ve môse zangbwale, be nga tyiñelane tison biyoñe zangbwal. Nde bepretre be nga taté na ba loñe toñ, a bezimbi be nga bete metyiñe yôp, a yôtan a ngule jap ése. Ane mimfine ya Jéricho mi nga bu’i! Ve nda Rahab é nga li’i é tele ne bip. Rahab a nda bôte jé be nga bi ényiñ amu be nga buni Yéhôva.