Wo di zwei Spion vo de Israelite z Jericho achömmed, übernachted si im Huus vo de Rahab. Wo de König vo Jericho das ghört, schickt er Soldate zu ihre. Drum versteckt si d Spion uf em Dach und schickt d Soldate in e anderi Richtig weg. D Rahab seit zu de Spion: «Ich helfe euch. Ich bin nämlich ganz sicher, dass Jehova uf eue Siite isch und ihr das Land werded übercho. Bitte verspreched mir, dass mini Familie am Lebe bliibt.»

D Spion säged zu de Rahab: «Mir verspreched dir, dass niemerem i dem Huus öppis passiert. Henk e roti Schnuer us dim Fenschter use, und dini Familie wird grettet.»

S Huus vo de Rahab staht uf de Stadtmuur. Drum laat si d Spion amene Seil durs Fenschter abe. Bevor si zum Josua zrugg göhnd, verstecked si sich drü Täg i de Berge. Wo si wider bim Volk sind, göhnd d Israelite dur de gstauti Jordan und mached sich parat, Kanaan z erobere. Jericho isch di erschti Stadt, wo si inehmed. Jehova seit ihne, si sölled sechs Täg lang um d Stadt umelaufe, jede Tag emal. Und am sibete Tag marschiered si sibe Mal um d Stadt ume. D Prieschter blased denn i ihri Hörner und d Soldate schreied so luut, wie si nume chönnd. Jetzt krached d Muure vo Jericho zäme. S Huus vo de Rahab bliibt aber stah. D Rahab und ihri Familie sind grettet, wil d Rahab uf Jehova vertraut het.