Lebuh dua iku pematau orang Israel mansang ngagai nengeri Jeriko, seduai iya bemalam ba rumah seiku indu ke benama Rahap. Raja nengeri Jeriko nemu pasal tu lalu nganjung bala soldadu iya ngagai rumah Rahap. Rahap ngelalai dua iku pematau nya ba perabung rumah lalu ngasuh soldadu nya ngagai jalai bukai. Iya madah ngagai pematau nya: ‘Aku nulung seduai laban aku nemu Jehovah bepiak enggau kita lalu deka ngalahka menua tu. Besemaya meh enggau aku kita deka nyelamatka kami sebilik.’

Dua iku pematau nya madah ngagai Rahap: ‘Kami besemaya nadai seiku orang ba rumah tu deka dibunuh.’ Ku sida: ‘Tanchangka tali mirah tu ba jenila, lalu kita sebilik deka selamat.’

Rahap nurunka dua iku pematau nya ngena tali ari jenila iya. Seduai nuju endur ti bebukit lalu belalai dia tiga hari sebedau pulai baru ngagai Josua. Udah nya, orang Israel meraka Sungai Jordan lalu besedia deka nyerang nengeri nya. Jeriko nengeri ti keterubah dialahka. Jehovah ngasuh sida ngelingi nengeri nya sekali sehari  dalam enam hari. Ba hari ketujuh, sida ngelingi nengeri nya tujuh kali. Bala imam nyepu terumpit, lalu bala soldadu manjung enggau pengabis penginggar nyawa sida. Tekala nya, dinding kuta nengeri nya runtuh! Tang, rumah Rahap mengkang bediri. Rahap enggau diri sebilik selamat laban iya arapka Jehovah.