Nọ ekiotọ Izrẹl na a te okpẹwho Jeriko, a te wo họ uwou aye jọ nọ a re se Rehab. Nọ ovie Jeriko o yo kpahe onana, o te vi isoja riẹ kpobọ uwou Rehab. Rekọ Rehab o te si ekiotọ na no họ ehru uwou riẹ, jẹ ta kẹ isoja na nọ ekiotọ na a nyavrẹ no. Ọ tẹ ta kẹ ekiotọ na nọ: ‘Me ti fiobọhọ kẹ owhai keme mẹ riẹ nọ Jihova ọ rrọ kugbe owhai, yọ wha ti fi okpẹwho nana kparobọ. Ivie wha ya eyaa kẹ omẹ nọ wha ti siwi omẹ avọ uviuwou mẹ.’

Ekiotọ na a tẹ ta kẹ Rehab nọ: ‘Ma ya eyaa kẹ owhẹ nọ ohwo kpobi nọ ọ rrọ evaọ uwou ra ọ te zọ.’ A tẹ jẹ ta kẹe nọ: ‘Thuru ufi owawae họ unwido uwou ra, kẹsena ahwo uviuwou ra kpobi nọ a ruọ evaọ uwou na a vẹ te zọ.’

Rehab o te thuru ufi họ unwido riẹ, ekiotọ na a tẹ rọ ufi na gadiẹ ruọ otọ. A tẹ dhẹ kpobọ igbehru, je dhere obei edẹ esa taure a te ti zihe bru Joshua. Kẹsena emọ Izrẹl a tẹ fa ethẹ Jọdan vrẹ, jẹ ruẹrẹ oma kpahe re a fi okpẹwho na kparobọ.  Jeriko họ okpẹwho ọsosuọ nọ a fi kparobọ. Jihova ọ tẹ ta kẹ emọ Izrẹl nọ a nya okpẹwho na wariẹ họ ẹsiẹvo okpẹdẹ evaọ edẹ ezeza. Evaọ ẹdẹ avọ ihrẹ, a tẹ nya okpẹwho na wariẹ họ asia ihrẹ. Nọ izerẹ na a bi kporo egba rai na, yọ isoja na a bi bo gaga. Kẹsena igbẹhẹ okpẹwho na i te kporo fihọ otọ! Rekọ uwou Rehab nọ o jọ evaọ ugbẹhẹ na u kporo ho, u dikihẹ. Rehab avọ uviuwou riẹ a zọ keme a fievahọ Jihova.