Rĩrĩa Aisiraeli arĩa maatũmĩtwo magatuĩrie Jeriko maakinyire kuo, maaikarire kwa mũtumia wetagwo Rahabu. Mũthamaki wa Jeriko nĩ aamenyire ũndũ ũcio na agĩtũma thigari ciake kwa Rahabu. Rahabu nĩ aahithire andũ acio nyũmba igũrũ na akĩonereria thigari icio ithiĩ na mwena ũngĩ. Eerire andũ acio ũũ: ‘Nĩ ngũmũteithia tondũ nĩ njũĩ atĩ Jehova arĩ hamwe na inyuĩ na nĩ mũkũhootana. Ndamũthaitha mwĩhĩte atĩ nĩ mũkaahonokia famĩlĩ itũ.’

Andũ acio meerire Rahabu ũũ: ‘Twakwĩra na ma gũtirĩ mũndũ o na ũmwe wa famĩlĩ yanyu ũkaaninwo.’ Maacokire makĩmwĩra ũũ: ‘Oherera rũrigi rũtune ndirica-inĩ nĩguo famĩlĩ yanyu ndĩkananinwo.’

Rahabu aarekire andũ acio moimĩre ndirica makĩhũthĩra mũkwa. Morĩire irĩma-inĩ na makĩĩhitha kuo thikũ ithatũ matanacoka kũrĩ Joshua. Thutha ũcio, Aisiraeli nĩ maaringire Rũũĩ rwa Jorodani na makĩĩhaarĩria kwĩyoera bũrũri  ũcio. Itũũra rĩa mbere rĩrĩa maahootire rĩarĩ Jeriko. Jehova aamerire mathiũrũrũke itũũra rĩu riita rĩmwe o mũthenya kwa ihinda rĩa thikũ ithathatũ. Mũthenya wa mũgwanja maathiũrũrũkire itũũra rĩu maita mũgwanja. Thutha ũcio athĩnjĩri-Ngai makĩhuha macoro, nacio thigari ikĩanĩrĩra na mũgambo mũnene mũno. Thingo cia itũũra ciamomokire ciothe, no nyũmba ya Rahabu ndĩamomokire o na gũtuĩka yarĩ rũthingo-inĩ. Rahabu na famĩlĩ yao nĩ maahonokirio tondũ nĩ eehokete Jehova.