Eshi eendadi dOvaisrael da li da ya koshilando Jeriko, oda li meumbo lomukainhu wedina Rahab. Ohamba yaJeriko oya li ye shi mona mo ndele tai tumu ovakwaita va ye keumbo laRahab. Rahab okwa li a holeka eendadi odo kombada yonduda ndele ta lombwele ovakwaita va ka konge kumwe ku lili. Okwa li a lombwela eendadi ta ti: ‘Ohandi mu kwafele molwaashi ondi shii kutya Jehova oku li pamwe nanye nota mu ka finda oshilongo eshi. Ohandi mu indile mu udanekele nge kutya otamu ka xupifa oukwaneumbo wange.’

Eendadi oda li da lombwela Rahab da ti: ‘Otwa udaneka kutya kape na nande oumwe meumbo loye ta ka fya.’ Oda ti yo: ‘Mangela ongodi itilyana pekende loye, noukwaneumbo woye otau ka xupa.’

Rahab okwa li a pitifa eendadi mekende tadi endele kongodi. Oda li da ya keemhunda nokukala da hondama oule womafiku atatu fimbo inadi shuna kuJosua. Opo nee Ovaisrael ova li va tauluka omulonga waJordan nove lilongekida oku ka nangala oshilongo. Tete, ova li ve na okufinda oshilando Jeriko. Opo nee Jehova okwa li e va lombwela va dingilile oshilando lumwe keshe efiku oule womafiku ahamano. Mefiku etiheyali, ova li ve na okudingilila  oshilando oikando iheyali. Opo nee ovapristeri ova li va shika omanghuma, novakwaita ova li tava ingida mokulekule. Ekuma loshilando ola li la teka po. Ashike eumbo laRahab olo la li la kwatafana nekuma kala li la teka po. Rahab noukwaneumbo waye ova li va xupa molwaashi ova li ve lineekela muJehova.