We di Izrɛlayt man dɛn go luk di siti na Jɛriko, dɛn bin de na wan uman in os we nem Reab. Di kiŋ bin kam fɔ no se dɛn de na Reab in os, so i sɛn sojaman dɛn de. Reab ayd di man dɛn we go luk di siti ɔp in ruf, ɛn i tɛl di sojaman dɛn se dɛn dɔn go ɔdasay. Reab tɛl di man dɛn we go luk di siti se: ‘A go ɛp una bikɔs a no se Jiova de wit una, ɛn i go gi una dis land. Duya una prɔmis mi se una go sev mi famili.’

Di man dɛn we go luk di siti tɛl Reab se: ‘Wi de prɔmis yu se nɔbɔdi nɔ go day na yu os.’ Dɛn tɔk se: ‘Tay rɛd rop na yu winda, ɛn yu famili nɔ go day.’

Reab tay rop na in winda fɔ mek di man dɛn we go luk di siti yuz am fɔ kam dɔŋ. Dɛn go ayd na di mawntin fɔ tri dez bifo dɛn go bak to Jɔshwa. Dɔn di Izrɛlayt dɛn krɔs di Jɔdan Riva, ɛn dɛn bin rɛdi fɔ go tek di land. Jɛriko na di fɔs siti we dɛn bin tek.  Jiova bin tɛl dɛn fɔ mach rawnd di siti fɔ siks dez, wan tɛm fɔ de. Di de we mek sɛvin, dɛn mach rawnd di siti sɛvin tɛm. Dɔn di prist dɛn blo dɛn trɔmpɛt dɛn, ɛn di sojaman dɛn ala lawd lawd wan. Na de di wɔl dɛn na di siti fɔdɔm! Bɔt Reab in os, we bin de na di wɔl, nɔ bin fɔdɔm. Reab ɛn in famili bin sev bikɔs dɛn bin abop pan Jiova.