တၢ်မၤလိ ၃၀
နီၢ်ရၤဃးပာ်ခူသူၣ် ပှၤကွၢ်ဟုၣ်တၢ်ဖိခံဂၤ
ဖဲပှၤကွၢ်ဟုၣ်တၢ်ဖိခံဂၤ လဲၤလၢဝ့ၢ်ယရံၤဃိအခါ အဝဲသ့ၣ်လဲၤအိၣ်ဝဲလၢ နီၢ်ရၤဃးအဟံၣ်လီၤ. ဖဲယရံၤဃိအစီၤပၤသ့ၣ်ညါဝဲအခါ အဝဲမၢလီၤဝဲပှၤသုးဖိတဖၣ်ဆူ နီၢ်ရၤဃးအဟံၣ်လီၤ. နီၢ်ရၤဃးပာ်ခူသူၣ်ပှၤကွၢ်ဟုၣ်တၢ်ခံဂၤအံၤလၢ အဟံၣ်ခိၣ်ဒီး မၢဝဲယရံၤဃိအသုးဖိတဖၣ်လဲၤ ဃုကွၢ်အဝဲသ့ၣ်လၢ တၢ်လီၢ်အဂၤတတီၤလီၤ. ဝံၤဒီး နီၢ်ရၤဃးတဲဘၣ်ပှၤကွၢ်ဟုၣ်တၢ်ခံဂၤအံၤလၢ– ‘ယမၤစၢၤသုန့ၣ် ခီဖျိလၢယသ့ၣ်ညါလၢ ယဟိဝၤယွၤအိၣ်ဒီးသု ဒီးကဟ့ၣ်လီၤသု ထံကီၢ်တဘ့ၣ်အံၤအဃိလီၤ. ဝံသးစူၤအၢၣ်လီၤအီလီၤယၤလၢ သုကမၤပူၤဖျဲးယဟံၣ်ဖိဃီဖိမီၤ.’
ဒီးပှၤကွၢ်ဟုၣ်တၢ်ခံဂၤန့ၣ် တဲဘၣ်နီၢ်ရၤဃးလၢ– ‘ပအၢၣ်လီၤအီလီၤနၤလၢ ကယဲၢ်ပှၤအိၣ်လၢနဟံၣ်ပူၤန့ၣ် ကပူၤဖျဲးဝဲခဲလၢာ်လီၤ. ဘၣ်ဆၣ်နကဘၣ်စဲၤလီၤပျံၤဂီၤတဘိလၢ နပဲတရီအချၢ. နမ့ၢ်မၤဒ်န့ၣ်န့ၣ် နၤဒီးနဟံၣ်ဖိဃီဖိကပူၤဖျဲးဝဲလီၤ.’
နီၢ်ရၤဃးစဲၤလီၤပျံၤလၢ ပဲတရီအချၢဒီးမၢဝဲ ပှၤကွၢ်ဟုၣ်တၢ်ခံဂၤအံၤ စံၣ်လီၤဝဲလီၤ. ပှၤကွၢ်ဟုၣ်တၢ်ခံဂၤအံၤ လဲၤဃ့ၢ်လၢကစၢၢ်ခိၣ် ဒီးအိၣ်ခူသူၣ်ဝဲဖဲန့ၣ်သၢသီလီၤ. ဝံၤဒီးအဝဲသ့ၣ်က့ၤကဒါက့ၤဆူ စီၤယိၤၡူအအိၣ်လီၤ. ပှၤအံၣ်စရ့လးဖိတဖၣ် ခီဂာ်ဝဲထံကျိယၢ်ဒ့ၣ် ဒီးကတဲာ်ကတီၤထီၣ်အသးလၢ ကလဲၤမၤန့ၢ်ထံကီၢ်န့ၣ်လီၤ. ဝ့ၢ်ယရံၤဃိန့ၣ် မ့ၢ်ဝ့ၢ်အဆိကတၢၢ်တဖျၢၣ်လၢ ပှၤအံၣ်စရ့လးဖိမၤနၢၤဝဲလီၤ.
ယဟိဝၤယွၤမၢပှၤအံၣ်စရ့လးဖိတဖၣ် ဟးတရံးဝ့ၢ်အံၤတနံၤတဘျီလၢ ဃုသီအတီၢ်ပူၤလီၤ. ဘၣ်ဆၣ် ဖဲနွံသီတသီန့ၣ် ပှၤအံၣ်စရ့လးဖိတဖၣ် ကဘၣ်ဟးတရံးဝ့ၢ်အံၤနွံဘျီညါ. ဝံၤဒီး ပှၤလုၢ်တၢ်အခိၣ်တဖၣ် အူထီၣ်ဝဲကွဲၤ ဒီးပှၤအံၣ်စရ့လးအသုးဖိတဖၣ်န့ၣ် ကိးပသူထီၣ်လၢ အကလုၢ်ဖးဒိၣ်လီၤ. ဒီးဝ့ၢ်ယရံၤဃိအဝ့ၢ်ခိၣ်ဒူ လီၤပှီၢ်ဝဲတဘျီဃီလီၤ. ဘၣ်ဆၣ် နီၢ်ရၤဃးအဟံၣ်န့ၣ် တလီၤပှီၢ်ဝဲဘၣ်. မ့ၢ်လၢနီၢ်ရၤဃးအိၣ်ဒီးတၢ်နာ် ယဟိဝၤယွၤအဃိ အဝဲဒီးအဟံၣ်ဖိဃီဖိပူၤဖျဲးဝဲလီၤ.“ဒ်န့ၣ်အသိး . . . နီၢ်ရၤဃးတဂၤ တူၢ်လိာ်ကလူးတဖၣ်, ဒီးမၢအက့ၤက့ၤ ကျဲတဘိဒၣ်ဒီး, ဘၣ်စ့ၢ်ကီး တၢ်ပာ်တီပာ်လိၤအီၤလၢ တၢ်မၤတဖၣ်အဃိ, တမ့ၢ်ဘၣ်ဧါ.”—ယၤကိာ် ၂:၂၅