Vava alangi bayenda kuna mbanza Yeriko, balwakila muna nzo a nkento mosi wakala ye nkumbu a Rakabi. O ntinu a Yeriko wawá e nsangu zazi ye watuma makesa kuna nzo a Rakabi. Kansi, Rakabi wasweka alangi wole kuna nludi yo fila makesa benda kubavavila mu nzila yankaka. Rakabi wavovesa alangi vo: ‘Nzolele kunusadisa kadi nzeye wo vo Yave una yeno, sunda nusunda e nsi yayi. Dodokolo, nundila e ndofi vo nuvuluza e yitu yame.’

Alangi bavovesa Rakabi vo: ‘Tudidi e ndofi vo ke mosi ko okala mu nzo aku ovondwa.’ Bankanikina vo: ‘Kanga o nsinga ambwaki vana zianela kimana yitu yaku yalembi fwa.’

Rakabi wakulumuna alangi muna nsinga vana zianela. Bayenda kuna mongo yo swekama kûna lumbu tatu vitila bavutuka kwa Yosua. I bosi, Aneyisaele basauka o Nkoko a Yodani mu kwenda baka e nsi. Yeriko i mbanza yantete babaka. Yave wabavovesa vo bazieta e mbanza nkumbu mosi muna  konso lumbu, bafwete wo vanga lumbu sambanu. Muna lumbu kiansambwadi, bazieta e mbanza nkumbu nsambwadi. I bosi, anganga basika e mpungi, makesa bakaza mu ndinga yangolo. Vana vau, e yaka ya mbanza yabwa vana ntoto. Kansi, e nzo a Rakabi yakala vana ndambu a yaka ke yabwa ko. Rakabi ye yitu yandi bavuluzwa kadi wabunda e vuvu muna Yave.