Matwela ba Maisilaele hane baile mwa muleneñi wa Jeriko, nebaizo fitela mwa ndu ya musali yabizwa Rahaba. Mulena wa Jeriko aziba taba yeo mi aluma masole kwa ndu ya Rahaba. Apata matwela bababeli fa situwa sa ndu yahae mi asupeza masole kwa sibaka sisili. Abulelela matwela kuli: ‘Nika mitusa kakuli naziba kuli Jehova uinzi ni mina mi ni kuli muka hapa naha ye. Nikupa kuli munisepise kuli mukapilisa lubasi lwaka.’

Matwela bao babulelela Rahaba kuli: ‘Ka niti luli, hakuna yakaholofala mwa ndu yahao.’ Bamubulelela kuli: ‘Utame muhala omufubelu fa lihaulo, mi lubasi lwahao lukapiliswa.’

Rahaba azwiseza matwela fande mwa lihaulo ka muhala. Baya kwa malundu mi bayo ipata kwateñi ka mazazi amalaalu basika kutela kale ku Joshua. Maisilaele basila Nuka ya Jordani, mi nebaitukiselize kuluwa naha. Jeriko neli ona muleneñi wapili one batuzi. Jehova naababulelezi kuli bapotolohe muleneñi wo inze bacaula hañwi ka zazi mi baeze cwalo  ka mazazi a 6. Fa lizazi labu 7, bapotoloha muleneñi wo ha 7 inze bacaula. Cwale baprisita baliza litolombita zabona, mi masole bahuwa ka kutiisa ka mone bakonela kaufela. Mamota a muleneñi wo awa! Kono ndu ya Rahaba, ili yeneli kwa limota, neisika wa. Rahaba ni lubasi lwahae nebapilisizwe kakuli naasepile Jehova.