Nopa omej tlakamej katli tlachiatoj Jericó mokajkej ipan ichaj se siuatl katli motokaxtiyaya Rahab. Kema nopa tlanauatijketl kimatki, kintitlanki isoldados ma yakaj Rahab ichaj. Rahab kintlatik kalpani nopa omej tlakamej uan kiniljuik nopa soldados sejkanok ma kintemotij. Uajka Rahab kiniljuik nopa omej tlakamej: “Niinmechpaleuis pampa nijmati Jehová itstok inmouaya uan inmoaxkatisej ni tlali. Xinechiljuikaj inkinmanauisej nochampoyouaj”.

Nopa omej tlakamej kiiljuijkej Rahab: “Tlaj tijuiyonis se lazo chichiltik ipan moventana, nochi katli itstosej kalijtik amo tleno kinpanos. Kiampa momanauisej mochampoyouaj”.

Rahab kinpaleuik nopa omej tlakamej ma mochololtikaj, kiilpik se lazo ipan iventana uan kiniljuik nopaya ma temokaj. Nopa omej tlakamej yajkej ipan tepetinij uan nopaya motlatijkej eyi tonali, uan teipa kiitatoj Josué. Teipa israeleuanij kiixkotonkej ueyatl Jordán uan mokualchijchijkej pampa moaxkatiskiaj nopa tlali. Achtoui moaxkatiskiaj Jericó. Jehová kinnauatik israeleuanij ma kiyaualokaj  nopa altepetl sampatsi ipan se tonali. Chikuasej tonali kiampa kichijkej. Ipan tonali chikome, israeleuanij chikompa kiyaualojkej nopa altepetl. Uan nopa sacerdotes tlapitskej, uan israeleuanij katli tlateuiskiaj chikauak kuatsajtsikej. ¡Uajka nopa tepamitl tlen kiyaualojtoya nopa altepetl uelonki! Maske Rahab ichaj eltoya ipan nopa tepamitl, amo uetski. Rahab uan ichampoyouaj momanauijkej pampa ya motemachik ipan Jehová.