Vafei vo vaIziraeri pavakaenda ku dhorobha ro Jeriko, ivona vakagara pa muzi wo mwanakaji waidaninjwa kuti Rahabhe. Mambo wo Jeriko wakazvizwa, wotumira masoca kuti aende kumuzi ka Rahabhe. Rahabhe wakaviga vafei vaviri panyezuru po nyumba zve woendesa masoca ku divi rimweni. Iyena wakati kuno vafei: ‘Ndinozomubesera ngo kuti ndinozviziva kuti Jehovha anemwi zve imwimwi munozonyisa nyika ino. Ndapota ndigondesenyi kuti munozoponesa mbhuri yangu.’

Vafei vakati kuna Rahabhe: ‘Tinokugondesa kuti apana na umwe anozova mu kati mo nyumba yako anozourawa.’ Ivona vakati: ‘Sungirai bote ro kupsuka ngo pajhanera yako zve iwewe no ukama hwako munozoponeswa.’

Rahabhe wakabzusa vafei ngo pa jhanera yake. Ivona vakaenda ku dundhu vopejeyo njiku ndhatu vacito vakahwirira ka Joshuwa. Perepo vaIziraeri vakaambuka Murambo wa Jorodhani zve vakanasirira kuti vaende kootora nyika. Jeriko rainga dhorobha ravakatanga kunyisa. Jehovha wakavabvunja kuti vatenderere dhorobha vecigogoma kamwe pa  njiku mbhera njiku ndhandhatu. Pa njiku yo cinomwe, inova vakatenderera dhorobha kanomwe. Vapiri vakarija mbhayapaya javo, zve masoca akakhuwa mbhera panoperera izwi ravo. Mupfimbiji jo dhorobha jakatanga kuhidhika! Asi nyumba ya Rahabhe, yainga yakabatana no mupfimbiji, yakaramba yakaima. Rahabhe no mbhuri yake vakapona ngokuti iyena waithemba Jehovha.