Ízrel dineʼé binaalchíʼí Jérikogóó ííʼáazhgo asdzání Réíhab bighangi baa ałkʼeejizkéé ńtʼééʼ. Jériko binaatʼáanii díí baa ákozhniizı̨́įʼgo, siláo Réíhab bighangóó ayííłʼaʼ. Naalchiʼí nidiltʼé yę́ę kin bighą́ą́ʼgóó ajííłʼaʼ áádóó siláo yę́ę éí náánáłahjįʼgo ajííłʼaʼ. Naalchiʼí yę́ę ábizhdííniid: ‘Níká adeeshwoł nisin, háálá Jiihóvah nił hónílǫ́ dóó díí kéyah bikʼeh didoodleeł shił bééhózin. Tʼáá shǫǫdí shikʼéí bił dashighanígíí shá yisdádadohnił.’

Naalchiʼí éí Réíhab ánéidooʼniid: ‘Nighan hazʼą́ągi éí doo łaʼ atídoolníił da.’ Áádóó kóbiʼdooʼniid: ‘Tłʼóół łichííʼ léiʼ nitsésǫʼdę́ę́ʼ adáátʼíʼgo ádíílííł éí binahjįʼ nighan hazʼą́ą́dóó tʼáá ałtso yisdádookah.ʼ

Réíhab éí bitsésǫʼdę́ę́ʼ naalchiʼí yę́ę tłʼóół yee adayííʼeezh. Éí tááʼ yiską́ąjįʼ dził bighą́ąʼdi nízhdéestʼı̨́ı̨́ʼ áadi índa Jáshowa bichʼįʼ níjítʼáázh. Áádóó Ízrel dineʼé kéyah hó dadooleeł biniyé Jórdan Tooh haʼnaa nijiníná. Jériko kin dah shijaaʼígíí éí áłtsé  yikʼeh dadeesdlı̨́ı̨́ʼ. Jiihóvah ábíłní, díí kin haalʼáhígíí hastą́ą́ jı̨́įjįʼ tʼááłáhídi binínáhkah doo. Tsostsʼid yiskání góneʼ éí Jériko kin haalʼáhígíí tsostsʼidi binídoohkah. Áádóó náádaʼiiłniihii bee íʼdílzoołí bidilní yee ádaaníigo, diné nidaabaahii éí ayóó íitsʼaʼgo hadadeeshghaazh. Ńtʼééʼ kin haalʼáhígíí ditą́ągo binaa ahééʼítłʼinii yę́ę nááłdááz! Ákondi Réíhab bighan binaa ahééʼítłʼinii tʼéiyá chʼéédzííʼ. Réíhab dóó bighan hazʼą́ą́dóó éí ałtso yisdábiʼdooʼnil, éí Jiihóvah baʼjoozliʼígíí biniinaa.