Puetyi ovalavi ova Isilayeli vapita mepundaumbo lio Jerikoo, vehikilile mondyuo yomukai umwe utiwa o Raabe. Etyi ohamba yo mo Jerikoo yetyiiva aitumu omafualali mondyuo ya Raabe. Raabe aholeka ovalavi ovo vevali mondyuo yae iya alekesa omafualali ondyila onkhuavo. Apopila ovalavi okuti: ‘Mandyimukuatesako mokonda ndyityii okuti onwe muna Jeova iya onwe mamutambula otyilongo. Mbambavo mphopilei okuti mamuhupisa ame nombunga yange.’

Ovalavi avapopila Raabe okuti: ‘Ovanthu aveho mavakala mokati kondyuo yove mavahupu.’ Tupu avapopi okuti: ‘Kuta ependa enkhuhu pondyanena yove opo ombunga yove ihupe.’

Raabe aiti ovalavi vatulukile kepanda akutila pondyanena yondyuo yae. Ovalavi avakaholama monomphunda ononthiki ononthatu, konyima avaende noku Josue. Etyi ova Isilayeli vayauka Ondongi yo Jordau a velipongiya opo vatambule otyilongo. Epunda-umbo lio tete vafinda o Jerikoo. Jeova  evepopila opo velisete like monthiki nepunda-umbo mokueenda kwo nonthiki epandu. Monthiki yapandu-vali avelisete nalio ovikando epandu-vali. Pahe ovanakwa avahiki ononkhuino, omafualali aeliyavela peulu. Ovimato vio Jerikoo avitokopo! Mahi ondyuo ya Raabe ayahatoko. Raabe nombunga yae avahupu mokonda ankho Raabe wayumba onthumbi mu Jeova.