Obu entatsi z’Abaisraeli zaaza omu rurembo Yeriko, zikaza omu nju y’omukazi orikwetwa Rahabu. Omugabe wa Yeriko ku yaakimanyire yaaragiira abaserukare kuza omu nju ya Rahabu. Rahabu akashereka entatsi ibiri aha mutwe gw’enju kandi yaagambira abaserukare kutoora omuhanda ogundi. Akagambira entatsi ati: ‘Niinza kubahwera ahakuba nimmanya ngu Yehova ari naimwe kandi nimuza kutwara ensi egi. Nimbeshengyereza mundaganise ngu nimwija kunjuna n’ab’eka yangye.’

Entatsi zikamugira ziti: ‘Nitukuraganisa tituriita omuntu weena omu nju yaawe. Koma omugoye gurikutukura omu dirisa yaawe, kandi eka yaawe neija kujunwa.’

Rahabu akarabya entatsi omu dirisa ye barikushumira aha mugoye. Bakaza omu nshozi baayesherekayo kumara ebiro bishatu batakagarukire ahari Yoshua. Bwanyima Abaisraeli bakambuka Omugyera Yorudani kandi baayetebeekanisa kutwara ensi egyo. Yeriko rukaba ruri orurembo oru baabandize kusingura. Yehova  akabagira ngu bagyende beetoorore orurembo omurundi gumwe buri-izooba okumara ebiro mukaaga. Aha kiro kya mushanju, bakagyenda baayetoorora orurembo emirundi mushanju. Bwanyima abanyamurwa bakateera enzamba, kandi abaserukare bakateera orwari ruhango. Ebisiika by’orurembo bikagwa ahansi. Kwonka enju ya Rahabu, eyaabaire eri aha kisiika, teragwire. Rahabu n’ab’omuka ye bakahonokaho ahabw’okuba akeesiga Yehova.