Iskay israelitas Jericó llajtata qhawaj rispa Rahabpa wasinpi qhepakorqanku. Jericomanta reyqa, chayta yachaytawan soldadosta kacharqa Rahabpa wasinman. Rahabtaj chay israelitasta wasin patapi pakaykorqa. Soldadostataj waj ladoman kacharparerqa. Chantá chay iskay wateqajkunata nerqa: “Yachani Jehová Dios qankunawan kashasqanta, kay jallpʼatapis japʼikapunaykichejta. Chayrayku yanapasqaykichej. Jinapis mañakuykichej familiaymanta khuyakunaykichejta”, nispa.

Chay runastaj Rahabta nerqanku: “Puka waskhata ventanaykiman warkhuykunki chayqa, familiayki salvakonqa”, nispa.

Chantá Rahabqa chay iskay runasta ripunankupaj ventananta uraykucherqa. Chay runastaj niraj Josueman kutishaspa, kinsa diasta orqospi pakakorqanku. Chantá israelitasqa Jordán mayuta pasaspa Canaanta japʼikapunankupaj wakichikorqanku. Ñaupajtaqa Canaanmanta Jericota japʼikaporqanku. Chaypajtaj israelita  soldadosqa Dios nisqanman jina sojta diasta Jericota muyorqanku, sapa día uj kutita. Qanchis kaj diapitaj qanchis kutita muyorqanku. Chantá sacerdotes pututusta waqachisqankutawan, israelita soldados mayta qhaparerqanku. Llajtaj perqasnintaj ujllata thuñikorqa. Rahabpa wasintajrí, llajtaj perqanpi kaspapis mana thuñikorqachu. Rahabqa Jehová Diospi atienekusqanrayku familianwan salvakorqa.