Jericó llajtata ricunaman rij israelitacunaca Rahab shuti huarmipaj huasipimi saquirircacuna. Jericota mandaj chaita yachaj chayashpaca Rahabpaj huasimanmi soldadocunata cacharca. Paica chai ishqui israelitacunataca paipaj huasi jahuapimi pacarca. Soldadocunamanca, ‘ñami rircacuna shujtaj ladocunata mashcagrichij’ nircami. Rahabca israelitacunataca, ‘cancunataca ayudashami. Cai llajtataca cancunata Mandaj Dios cancunaman cunatami crini. Ñuca familiata ama huañuchipanguichij’ nishpami rogarirca.

Ishqui israelitacunaca Rahabtaca, ‘shuj puca huascata ventanapi huarcushpa saquijpica cambaj huasi ucupi cajcunaca mana ima tucungacunachu. Chashnami cambaj familiaca quishpiringacuna’ nircami.

Rahabca chai israelitacunataca, ‘ñuca huasi ventanamanta huascapi huarcurishpa uriyaichij’ nircami. Chashnami Jericomanta llujshichun ayudarca. Paicunaca quimsa punllacunata urcucunapi miticushpami Josuepajman tigrarcacuna. Qꞌuipaca israelitacunaca Jordán yacuta  pasashpa Jericó allpacunata japingapajmi allichirircacuna. Chai llajtami paicuna punta mishashca llajta cagrirca. Jehová Diosca Jericó llajta pirca huashata, punllapi shuj cutin muyuchunmi mandarca. Chaimi paicunaca sujta punllacunata punllanta shuj cutin pueblota muyurcacuna. Canchis punllapica canchis cutinmi muyurcacuna. Qꞌuipaca sacerdotecunami bocinapi tocarcacuna. Cutin soldadocunaca tucui fuerzahuanmi caparircacuna. Chai ratomi chai llajtapaj pircacuna urmarca. Rahabpaj huasica pirca jahuapi cashpapish mana urmarcachu. Rahabca Jehová Diospi crishcamantami paipaj familiapish quishpirircacuna.