Mudaenda anyakusuzumira dziko a Israeli ku nzinda wa Yeriko, iwo afikira pa nyumba ya nkazi akhacemerwa Rahabhe. Mambo wa Yeriko mudadzindikira iye pyenepi, atuma anyankhondo toera kuenda kunyumba ya Rahabhe. Rahabhe abisa anyakusuzumira dziko awiri pa ntsoi, pontho apanga anyankhondo toera aende na njira inango. Iye apanga anyakusuzumira dziko: ‘Ndinakuphedzani, thangwi ndisadziwa kuti Yahova ali kukhundu yanu, pontho munakunda dziko ino. Ndaphata miyendo, ndipikireni kuti munadzapulumusa banja yanga.’

Anyakusuzumira dziko apanga Rahabhe: ‘Tinapikira kuna iwe kuti nee m’bodzi anadzakhala n’nyumba yako anadzaphiwa.’ Iwo alonga: ‘Unamanga nkhambala iyi yakufwira pa janela yako, tenepa banja yako inadzapulumuka.’

Rahabhe apanga anyakusuzumira dziko kuti abuluke na pa janela mukuphatisira nkhambala. Iwo aenda ku mapiri mbabisala kweneko mu ntsiku zitatu mbadzati kuenda kaonana na Yoswa. Buluka penepo,  Aisraeli awambuka Nkulo wa Yordane mbakhunganyika toera kukunda dziko. Iwo atoma kukunda nzinda wa Yeriko. Yahova aapanga toera kuzungulira nzinda kabodzi pa ntsiku mu ntsiku zitanthatu. Mu ntsiku yacinomwe, iwo azungulira nzinda kanomwe. Buluka penepo, anyantsembe aliza matuluka, pontho anyankhondo akhuwa na mphambvu yonsene. Mipanda ya nzinda yagomoka! Mbwenye nyumba ya Rahabhe yakuti ikhali padzulu pa mipanda, nee yagomoka. Rahabhe na banjace apulumuka thangwi iye akhanyindira Yahova.