Pabaayiile ba mpuupa ba beena Isaleele mwiumbo dya Yeeriko, abatwelele mu nshibo ya Rahabe. Nfumu a beena Yeeriko batumine basalayi ku nshibo ya Rahabe. Aye nkufya ba mpuupa babidi mu kisasa na kutuma basalayi ku lungi lupese. Balungwile ba mpuupa shi: ‘Nenukwasha mwanda nauku shi Yehowa e neenu akenupa dino eumbo. Anka, tshipayi shi anukampaasha na kifuko kyande.’

Ba mpuupa abalungwile Rahabe shi: ‘T’akukalwishiibwa su ngumune a mu nshibo yoobe.’ Abamulungwile dingi shi: ‘Anya uno mooshi umonga kwididishi dya nshibo yoobe, beena kifuko kyobe abakapanda.’

Rahabe nkutadiila ba mpuupa bwabadya kuyika ku mooshi ubaadi mwanye kwididishi dyaye. Abayile ku myenge, abo nkufwama kwakwa munda mwa mafuku asatu kumpala kwabadya kwalukiila kwi Yooshwa. Akupu beena Isaleele nkusabuka Mwela wa Yoordano na kwilumbuula bwa kwata  nsenga. Yeeriko baadi kibundji kya kumpala kibaabadi batshokole. Yehowa nkwibalungula bwabadya kwifuunya kibundji musango umune kwifuku dyoso munda mwa mafuku asamombo. Mwifuku dya musambo, abaadi beefuunye kibundji misango musambo. Akupu ba tshiite mwakwidi abeelele mpungi, basalayi namu abaadi basame na mayi e bukopo. Midimba ya Yeeriko ibaaponene! Anka Rahabe na ba mushibo yaabo abaadi mwanka abapandjile. Rahabe na kifuko kyaye abapandjile mwanda baadi mukulupile mwi Yehowa.