Nimbamy ty tragno ty ampela raike atao tihoe Rahaba i mpitsikilo rey naho fa niavy ta Jeriko agne. Naho fa naharey izay ty mpanjaka i Jeriko, le nandefa maramila tamy i Rahaba agne. Naeta i Rahaba tambone tafo agne i mpitsikilo rey fa i maramila rey natoro’e lalagne hafa. Hoe ty Rahaba tamy i mpitsikilo rey: ‘Hampeako nareo. Fantako fa magnampe anareo ty Jehovah, le ho azo’areo ty tane toy iaby. Faie mba avoto raho naho ty longoko.’

Hoe i mpitsikilo rey tama’e: ‘Manao vava zahay fa tsy hagninogne ndra raike ze ndaty an-tragno’o ato.’ Hoe iareo: ‘Afeheo an-dafinete’o eo ty taly mena toy soa tie ho avotse nareo.’

Nazotso i Rahaba tamy ty taly i mpitsikilo rey naho fa handeha. Nandeha am-bohitse agne iareo sady nietake tagne tagnate ty telo andro vaho izay niheregne tamy i Josoa mbeo. Nitsake i Renerano i Jordanay o Israelitao, satria fa hiomagne hangalake i tane nampitamaegney. I Jeriko ty tanàgne voaloha’e nirese iareo. Hoe ty  Jehovah tamy iareo: ‘Hodidigno’areo indraike isan’andro agnate ty 6 andro o tanàgneo. Ie amy ty andro fahafito’e le hodidigno impito.’ Nitioke antsiva o mpisorogneo, le o maramilao nikorake mafe. Nikoromake amy izay ty manda i tanàgney, le i tragno i Rahabay avao ro tsy rava. Avotse ty Rahaba mirofoko satria natoky i Jehovah.