CHIIYO 30
Rahabbu Wakasisa Basikulanga-langa Nyika
Chiindi basikulanga-langa nyika bachiIsrayeli nibakayinka kumuunzi waJerikko, bakaakukkala mung’anda yamwanakazi uutegwa Rahabbu. Mwaami wakuJerikko naakamvwa, wakatuma basilumamba kuti bakabayanduule kung’anda yaRahabbu. Pesi Rahabbu wakasisa basikulanga-langa nyika babili kukaluli kang’anda mpawo wakalayilila basilumamba kuti bakabayandwiide kumbi. Mpawo wakabuzya basikulanga-langa nyika kuti: ‘Ndilamugwasya nkaambo ndilizi kuti Jehova uyoomugwasya kuti muzunde nyika eeyi. Amundisyomezye kuti muyoondifutula abamumpuli yangu.’
Mpawo basikulanga-langa nyika bakabuzya Rahabbu kuti: ‘Boonse bayooba anduwe mung’anda yako bayoofutuka.’ Alimwi bakayungizya kuti: ‘Wanga ntambo iisalala awindo lyang’anda yako alimwi bamumpuli yako bayoofutuka.’
Rahabbu wakaselusya basikulanga-langa nyika kabelesya ntambo njakaangide awindo. Bakaya kuzilundu akuyooyuba nkuko kwamazuba atatu, kuzwa waawo bakabweeda kuli Joshuwa. MaIsrayeli
bakazubuka Mulonga waJordani akulibambila kuyookona nyika. Muunzi waJerikko wakali wakusaanguna ngubakazunda. Jehova wakabuzya maIsrayeli kuti kabazyunguluka muunzi kamwi kwamazuba ali musanu akamwi. Mubuzuba bwamusanu atubili bakazyunguluka muunzi kwaziindi zili musanu azibili. Kuzwa waawo, bapayizi bakalizya myeembo yabo alimwi basilumamba bakoompolola ajwi pati. Miduli yamuunzi yakawa! Pesi ng’anda yaRahabbu yakasyaala kiiyimvwi nikuba kuti yakajisini amuduli wamuunzi waJerikko. Rahabbu abamumpuli yakwe bakafutuka nkaambo wakasyoma muli Jehova.“Mbubonya obo alakwe Rahabi sibwaamu sa teewakalulamikwa kumilimo awo naakasamausya batumwa akubapilula kunzila imbi?”—Jakobo 2:25