Ийи израиль хайгыылчы Иерихонга Раав деп херээжен кижиниң бажыңынга чедип келген. Ооң дугайында Иерихоннуң хааны билип кааш, Раавче дайынчыларын чоргузупкан. Раав хайгыылчыларны бажыңының кырынга чажырыпкаш, дайынчыларны өске орук-биле чоргузупкан. Раав хайгыылчыларга: «Мен силерге дузалажыр мен, чүге дизе Иегова силер-биле база бо чер силерниң боор деп билир мен. Чүгле мээң өг-бүлем дириг артар деп аазап көрүңер» — дээн.

Хайгыылчылар Раавка: «Сээң бажыңыңдан кым-даа өлбес. Кызыл хендирни соңгаңдан үндүр баглап каг. Ынчан өг-бүлең дириг артар» — деп аазаан.

Хайгыылчылар соңгадан хендир-биле бадып келгеш, дагларже дезе берген. Олар аңаа үш хонук чаштынгаш, Нуннуң оглу Иисуска чедип келген. Оон израильчилер Иордан хемни кешкеш, Аазаттынган черни эжелээринче белеткенип эгелээн. Оларның бир дугаар эжелээр хоорайы Иерихон турган. Иегова оларга ол хоорайны алды хүн дургузунда хүнде бир катап долгандыр кылаштаарын дааскан.  А чеди дугаар хүнде олар ону чеди катап долганган. Оон өргээ бараалгакчылары эдискизин этсиптерге, дайынчылар бар шаа-биле ыыткыр алгыржыпкан. Ынчан хоорайның ханалары буступ кээп дүшкен. Ынчалза-даа хоорайның ханазынга чурттап турган Раавтың бажыңы бүдүн арткан. Раав өг-бүлези-биле чүгле Иеговага бүзүрелиниң ачызында дириг арткан.