Xomoosiya Israaˈeela asati Yarkko katamaa biido wode, Raˈaabo giyo maccaasee keettan takkidosona. Yarkko kawoy hegaa siyidi Raˈaabi soo wotaaddarata kiittiis. A xomoosiya naaˈˈu asata shakkuwan qottaasu; qottada wotaaddarata harasaa yeddaasu. A xomoosiya asatuyyo hagaadan gaasu: ‘Yihooway intte bagga gidiyoogaanne intte ha biittaa xoonanaagaa ta eriyo gishshawu, taani inttena maaddana. Nu soo asaa ashshanawu hayyanintta taayyo qaalaa gelite.’

Xomoosiyaageeti Raˈaabiyyo, ‘Ne son deˈiya oonanne qohennaagaa nuuni qaalaa geloos’ yaagidosona. Eti, ‘Zoˈo wodoruwaa ne maskkootiyan qacha; yaatikko ne soo asay attana’ yaagidosona.

Raˈaaba xomoosiyaageeta ba maskkootiyaara wodoruwan duge wottaasu. Eti Yaasukko simmanaappe kase deriyaa biidi heezzu gallassaa qosettidosona. Hegaappe simmin, Israaˈeelati Yorddaanoosa SHaafaa pinnidi biittaa oyqqanawu giigettidosona. Eti xoonidi koyro oyqqido katamay Yarkko. Eti usuppun gallassi gakkanaassi hachi hachi  katamaa issitoo yuuyi aadhanaadan Yihooway etawu yootiis. Laappuntta gallassi, eti katamaa laapputoo yuuyi aadhidosona. Hegaappe guyyiyan, qeeseti bantta xurumbbaa punnidosona; wotaaddarati banttawu danddayettidaagaa keenaa xoqqu oottidi waassidosona. Katamaa dirssaa gimbbee laalettiis! SHin gimbbiyaara gaytti uttida Raˈaabi keettay laalettibeenna. Raˈaaba Yihoowan ammanettido gishshawu anne i soo asay attidosona.