Le israelitaʼob bin u yiloʼob bix u kaajil Jericooʼ, pʼáatoʼob tu yotoch juntúul koʼolel ku kʼaabaʼtik Rahab. Le ka tu yojéeltaj u reyil Jericó lelaʼ, tu túuxtaj soldadoʼob tu yotoch Rahab. Letiʼeʼ tu taʼakaj tu techoil u yotoch le kaʼatúul israelitaʼob bin u chʼúuktoʼob le kaajoʼ. Tsʼoʼoleʼ tu yaʼalaj tiʼ le soldadoʼob ka xiʼik u kaxtoʼob yaanal tuʼuxoʼ. Rahab túuneʼ tu yaʼalaj tiʼ le kaʼatúul israelitaʼoboʼ: ‹Yaan in wáantkeʼex tumen in wojel Jéeobaeʼ tiaʼan ta wéeteleʼexeʼ yéetel yaan u tsʼáaikteʼex le luʼumaʼ. Beet uts a waʼalikeʼexten yaan a salvartikeʼex in láakʼtsiloʼob›.

Le kaʼatúul israelitaʼoboʼ tu yaʼaloʼob tiʼ Rahab: ‹Wa ka kʼaxik junpʼéel chak suum ta ventanaeʼ, tu jaajil k-aʼaliktecheʼ maʼ tun úuchul mix baʼal kʼaas tiʼ le máaxoʼob yanoʼob ichil a wotochoʼ. Wa ka beetik beyoʼ a láakʼtsiloʼobeʼ yaan u salvarkubaʼob›.

Rahabeʼ tu tsʼáaj junpʼéel suum tu ventanail u yotoch utiaʼal u yáantik jóokʼol le kaʼatúul israelitaʼob teʼ tu kaajil Jericooʼ. Antes u suutoʼob teʼ tuʼux yaan Josueoʼ, letiʼobeʼ óoxpʼéel kʼiin tu taʼakubaʼob teʼ puʼukoʼoboʼ. Ka tsʼoʼokeʼ  le israelitaʼoboʼ tu kʼáatmáansoʼob le río Jordanoʼ yéetel tu líiʼsubaʼob utiaʼal u yokloʼob Jericó, le yáax kaaj ken u chʼaʼoboʼ. Jéeobaeʼ tu yaʼalajtiʼob ka marcharnakoʼob tu baʼpach le kaaj juntéen cada kʼiinoʼ. Lelaʼ bey tu beetiloʼob ichil seis kʼiinoʼoboʼ. Tu siete kʼiineʼ, marcharnajoʼob tu baʼpach le kaaj siete u téeneloʼ. Ka tsʼoʼokeʼ le sacerdoteʼoboʼ tu yustoʼob u trompetaʼob, yéetel le soldadoʼob israelitaʼoboʼ awatnajoʼob yéetel tuláakal u muukʼoʼob. Ka tu beetoʼob lelaʼ, júut u baʼpakʼiloʼob le kaajoʼ. Kex u yotoch Rahab tiaʼan kaʼach tu baʼpakʼiloʼob le kaajoʼ maʼ júutiʼ. Rahab yéetel u láakʼtsiloʼobeʼ tu salvartubaʼob tumen letiʼeʼ confiarnaj tiʼ Jéeoba.