Kunatï Jericó markar paskäna ukjja Canaán oraqenkir yaqha markanakajj istʼapjjarakïnwa. Ukatwa uka markanakan reyinakapajj israelitanakampi nuwasiñatak mayachtʼasipjjäna. Ukampis Gabaón markankirinakajj mä suma amtaruw puripjjäna. Thantha isinakampi isintasisaw Josué chachan ukar sarapjjäna. Akham sapjjarakïnwa: ‘Jaya markatwa jutapjjta. Jehová Diosatwa istʼapjjta, kunanaktï jumanak laykojj Egipto markansa Moab markansa lurkäna ukanaksa istʼapjjaraktwa. Jumanakatï markajar jan tukjañatak mä promesa lurapjjätajja, nanakajj jumanakaruw servipjjäma’ sasa.

Josué chachajj arunakap creyisaw markapar jan tukjañatak mä promesa luräna. Kimsürutwa, Josueajj kʼarisipjjatap yatjjäna: gabaonitanakajj janiw jaya markatäpkänti, jan ukasti Canaán oraqetäpjjänwa. Ukatwa Josueajj ‘¿kunatsa kʼarisipjjta?’ sasin säna. Jupanakasti sapjjänwa: ‘Wal ajjsarayasipjjta. Jehová Diosaw jumanakar yanapapjjtamjja. Mirä janikiy jiwarayapjjestati’ sasa. Josueajj promesap phoqasaw jan jiwaraykänti.

 Mä qhawqha urutjja, phesqa cananeo reyinakaw soldadonakapampejj gabaonitanakar jiwarayir sarapjjäna. Josué chachampi soldadonakapampejj arum paqaraw gabaonitanakar salvir sarapjjarakïna. Guerrajj wali alwat qalltäna. Cananeonakajj taqe cheqaruw escapapjjäna, ukampis Diosajj qalanak jupanakjjar chhijchhintayäna. Josué chachajj ‘inti saytʼayam’ sasaw Jehová Diosar mayisïna. Janis intejj saytʼirïkchïnjja, ¿kunatsa uk maypachäna? Jupajj taqe chuymaw Jehová Diosar confiyäna. Uka urojja, cananeo reyinakaru soldadonakaparu israelitanakan atipapjjañapkamajj janiw intejj jalantkänti.