Nwin inyu Yérikô u bi tjama ni biloñ bipe i Kanaan. Bikiñe bi biloñ bi, bi bi kit le bi nkodba inyu jôs bon ba Israel. Ndi, bôt ba Gibéôn ba bééna minsoñgi mimpe. Ba bi haba bipéda bi mambot, ba lo yak Yôsua, ba kal nye le: ‘Di nlôl haa ngandak. Ba bi pôdôl bés Yéhôva ni mam a bi boñ inyu nan i Égiptô ni i Môab. Jon ni bôn bés le, n’a lo bé i jôs bés gwét. Bés d’a yila minkol minan.’

Yôsua a hémle bo, a bôn ki bo le a ga jôs bé bo gwét. Ndi mbus dilo daa, Yôsua a léba le ba nlôl bé haa. Ba nyééne mu nkoñ Kanaan. Yôsua a bat bôt ba Gibéôn le: ‘Inyuki ni bi teembene bés?’ Ba timbhe le: ‘Di konok woñi! Di nyi le Yéhôva, Djob linan a njo inyu nan. Soho ni nol bañ bés.’ Yôsua a bi yônôs mbônga wé, a nol bé bo.

Hala a bi nom bé, bikiñe bitan bi Kanaan, mintôñ nwap mi gwét, bi kodba inyu jôs bôt ba Gibéôn. Yôsua ni bôt bé ba gwét  ba bi ke liké u wonsôna inyu sôñ bo. Gwét bi bi bôdôl i kel i bé noñ, bikegla tutu. Bôt ba Kanaan ba bi ke gwét ngwéé. Ba tjama ni nkoñ wonsôna. Ndi hiki homa ba bé ke, Yéhôva a bé bon le basoso ba ngok ba kwél bo. Mbus, Yôsua a bat Yéhôva le a boñ le hiañgaa hi telep homa wada. Inyuki a bi bat Yéhôva i jam li, a yik le hala a bé ngi bôña? A bi bat hala inyule a bé bôdôl Yéhôva ñem. Ñ, hiañgaa hi bi nañal bé ngim kel yosôna, letee bon ba Israel ba yémbél bikiñe bi Kanaan ni mintôñ nwap mi gwét.