Nunga tarbarita taringot na masa di Jeriko tu angka bangso na asing di Kanaan. Marsada ma nasida laho mangalo halak Israel. Alai asing do molo halak Gibeon. Dijumpangi nasida ma si Josua jala dipangke ma baju na maribak-ribak. Margabus ma nasida mandok, ‘Sian huta na dao do hami. Nunga dibege hami taringot Jahowa dohot angka na dibahen Ibana tu halak Mesir dohot tu halak Moab. Marjanji ma hamu asa unang mamorangi hami, olo do hami gabe hatobanmuna.’

Porsea do si Josua tu nasida jala marjanji ma ibana. Dungkon tolu ari, diboto ibana ma ndang dao hape huta ni nasida. Sian tano Kanaan do nasida. Disungkun ibana ma halak Gibeon, ‘Boasa margabus hamu?’ Dialusi nasida ma, ‘Na mabiar do hami! Diboto hami do na diurupi Jahowa hamu. Unang ma bunu hami.’ Diingot si Josua do janjina jala ndang dipamate nasida.

 Ndang sadia leleng, ro ma lima raja ni Kanaan mangancam halak Gibeon. Bornginna i, ro ma si Josua dohot tentarana mangurupi halak Gibeon. Manogotna i, marporang ma nasida mangalo halak Kanaan. Lari ma halak Kanaan, alai dibahen Jahowa ma udan batu tu nasida. Dung i, dipangido si Josua ma tu Jahowa asa unang bonom jo mata ni ari. Boasa boi pos rohana na boi masa i? Ala porsea do si Josua tu Jahowa. Tutu ma ndang bonom mata ni ari di tingki i sahat tu na talu angka raja ni Kanaan i.