PELAJAREN 31
Josua ras Kalak Gibeon
Berita kerna Jeriho si nggo italuken kalak Israel seh ku kerina kuta-kuta i Kanaan. Raja-raja kalak Kanaan pe ersada guna ngelawan kalak Israel. Tapi kalak Gibeon, lain rencanana. Ipakena uis si merigat-rigat, nce jumpaina Josua. Nina, ‘Ndauh kel kuta kami, nggo ibegi kami kerna Jahwe ras kai si ilakokenNa man kalak Mesir ras kalak Moap. Erjanjilah kam labo iserangndu kami. Nggit nge kami jadi budakndu.’
Tek Josua man kalak e. Emaka erjanji ia maka labo iserangna kalak e. Tapi, telu wari kenca si e, ieteh Josua maka nggo itokohi kalak e ia. Kepeken ndeher nge kuta kalak e i bas Kanaan. Isungkun Josua me kalak e, ‘Engkai maka ibualindu kami.’ Nina kalak e njawapsa, ‘Mbiar kami! Teh kami maka Jahwe nge si nampati kena erperang. Ula min bunuh kena kami.’ Ipediat Josua kalak e nggeluh bagi si ijanjikenna.
La ndekah kenca si e, lima raja kalak Kanaan erban rencana guna nerang kalak Gibeon. Emaka Josua ras tenterana ersikap guna nampati kalak e. Kalak e nggo mulai erperang ope lenga terang. Kiam me kalak Kanaan bagi manuk la rindung. Ku ja pe kalak e kiam, iban Jahwe gelah mate kalak e kena batu si megulang. Kenca si e, ertoto Josua man Jahwe gelah ngadi matawari. Matawari me la pernah ngadi, jadi ngkai maka ipindo Josua bage man Jahwe? Perban tek ia man Jahwe. Emaka terang lalap seh ngasa italuken kalak Israel raja-raja kalak Kanaan.
“Katakenlah, ‘ue’ adi tuhu janah katakenlah, ‘lang’ adi la tuhu. Lain asangken si e i bas Iblis nari kap rehna.”—Matius 5:37
