Sango hakutwala ku Yeriku kajinyingikine kuli mavungu akwo amu Kanana. Mianangana jamo, yalichinga hamuwika hanga ase jita ni A-Izalele. Alioze A-Ngibeone yanyonga cheka. Ayo yazala mazalo akusuwika, yaya kuli Yoshua ni kwamba ngwo: ‘Tunakatuka kusuku. Twevwa hakutwala kuli Yehova ni yuma yeswe yize alingile hali yenu mu Engitu ni ku Moape. Tulakenyenu ngwenu kunuchi kwasa jita ni yetu, hachino mutupwa ngamba jenu.’

Yoshua yatayiza ni kwaalakenya ngwenyi, kechi kwasa no jita. Hakupalika cha matangwa atatu, Yoshua yanyingika ngwo atu jacho te katunga hakamwihi. Ayo kapwile mu chifuchi cha Kanana. Chocho, Yoshua yaahula ngwenyi: ‘Mumu liaka nwatwonganga?’ Yakumbulula ngwo: ‘Woma te tunevu! Tunanyingika ngwetu, Yehova Zambi yenu kananwashila jita. Lisesa kanda nutushiha.’ Chocho, Yoshua yamanununa chilakenyo chenyi hakuhona kwaashiha.

Ha matangwa akehe wika, mianangana atano A-Kanana ni maswalale jo yaya ni kwasa jita ni A-Ngibeone. Yoshua ni maswalele jenyi yenda ufuku weswe hanga aye ni kulamwina  A-Ngibeone. Mukwachako, jita yiyiputuka. Hachino, A-Kanana yaputuka kuchina chamuchinyina. Kweswako apwile nikuchinyina Yehova yaputuka kwaaholwela mawe anene-anene. Chocho, Yoshua yeta kuli Yehova hanga amanyise tangwa. Chuma chino te kanda chichilingiwa kama nilimwe tangwa, mba mumu liaka iye etele kuli Yehova hanga amanyise tangwa? Mumu Yoshua kafulielele muli Yehova. Chocho, tangwa yilimana, ndo haze A-Izalele akumbile mianangana A-Kanana hamwe ni maswalale jo.