Heta nasión oikuaa umi israelita ojagarra hague Jericó ha okyhyjégui oñomoirũ hikuái oñorairõ hag̃ua umi israelita kóntrape. Péro umi gabaonita ojapo ótra kósa. Omonde hikuái umi ao ojegastapámava ha oho heʼi Josuépe: “Mombyryetereígui ningo roju. Rohendu opárupi oñeñeʼẽha Jehováre ha umi mbaʼe ojapóvare pendesalva hag̃ua umi egipcio ha umi moabítagui. Peprometéramo oréve ndapejapomoʼãiha orerehe mbaʼeve, roikóta pende esklávoramo”.

Josué oguerovia umi gabaonita heʼíva ha opromete chupekuéra ndojapomoʼãiha hesekuéra mbaʼeve. Péro tres día haguépe oñemombeʼu Josuépe umi gabaonita oikoha Canaánpente ha ndahaʼéi oúva hikuái mombyrýgui. Upévare Josué heʼi chupekuéra: “¿Mbaʼéreiko pendejapu oréve?”. Umi gabaonita heʼi chupe: “Ore ningo rokyhyje pendehegui, pórke roikuaa pende Jára Jehová oñorairõha pende favórpe. Aníntena orejuka”. Josué okumpli la opromete vaʼekue ha ndojapói hesekuéra mbaʼeve.

Upe riremínte, cinco rréi oĩva Canaánpe oho oataka ijehérsito reheve umi gabaonítape. Péro Josué ha ijehérsito pyaʼe oho  oipytyvõ hag̃ua umi gabaonítape, peteĩ pyhare pukukue oguata hikuái og̃uahẽ hag̃ua haʼekuéra oĩháme. Upéi pyharevete oñepyrũ oñorairõ hikuái. Umi cananeo odiparapa ha isarambi ápe ha pépe, péro Jehová omongy hiʼarikuéra umi amandáu tuichaicháva. Upéi Josué ojerure Jehovápe pe kuarahy opyta hag̃ua. Upéva ningo ndoikóiva gueteri arakaʼeve. ¿Mbaʼérepa Josué ojerure upéva Jehovápe? Pórke haʼe ojeroviaiterei vaʼekue hese. Upe díape napytũi umi israelita ojukapa peve umi cinco rréi cananeo ha ijehersitokuérape.