Dre nakaninkä Jericó ye namani gare juta mada mada nämene Canaán yei. Nitre reire juta jene jene te yekwe ja ükaninkrö keteitibe rükäre nitre Israel ben. Akwa nitre nünanka Gabaón käkwe ja töi mikani kukwe mada nuainne. Dän ngututure kitani kwetre jabätä aune nikanintre Josué känti aune niebare kwetre ie: ‘Kä mente känti nunki. Jehová dre dre nuainbare mun kräke kä Egipto aune kä Moab yekänti ye nunkwe kukwe nuabare. Munkwe ñaka rüdi nunbe ye munkwe käbämikai nunye angwane, nun rabai sribikä mun kräke’.

Ye namani era Josué kräke aune ñaka rüdi kwe niaratre rüere käbämikani kwe ietre. Akwa köbö nikani köbömä ta ye bitikäre, namani gare Josué ie nitre Gabaón ye ñaka nämene nüne kä mente känti ñakare aune nämenentre nüne Canaán. Ye medenbätä, Josué ngwantaribare ietre: ‘¿Ñobätä munkwe nun ngökabare?’. Niaratre niebare: ‘Ñobätä ñan aune kä jürä rababa nunbätä. Jehová Ngöbö munkwe tä rüre mun dokwäre ye gare nunye. Munkwe ñaka nun murie keta’. Josué kukwe käbämikani ietre ye erere nuainbare kwe aune ñaka kukwe tare nuainbare kwe niaratre yebätä.

 Kä nikani braibe ta angwane, nitre reire nirike canaán ye nikani nitre rükä kwetre yebe rüre nitre Gabaón ben. Josué aune nitre rükä kwe nänbare dibire ta nitre Gabaón mikakäre kwäre. Jetebe se kwrere dekä rü ye kömikani. Nitre Canaán namani ngitie kä jökrä kokwäre, akwa Jehovakwe ñü järe krikri krubäte mikani näkäin niaratrebiti. Angwane, Josué ribebare Jehovai ñänä rabadre kwekebe. Ñänä ñaka nämene nemen kwekebe jire. ¿Ñobätä Josué ye ribebare? Ñobätä ñan aune nämene tö ngwen krubäte Jehovai. Aisete ñänä namani kwekebe. Köbö yete kä ñaka namani drüne nememe nitre Israel nitre reire Canaán aune nitre rükä kwetre ganainbare ye ngwane.