Oviwaṋa vyarwe mehi raKanaan vya zuva ombuze ohunga na Jeriko. Ozombara zawo za tya kutja maze rikutu kumwe okurwisa Ovaisrael. Posiya Ovagibeon va tya ondunge yarwe. Owo va ya ku Josua ava zara ozombanda nḓa tauka nave tja: ‘Eṱe matu zu kehi rokokure. Eṱe twa zuva ohunga na Jehova navihe mbye mu tjitira moEngipte na Moab. Arikaneye tu kwizikire kutja kamu nokuturwisa, neṱe matu rire ovakarere veṋu.’

Josua wa kambura mu wo neve raere kutja kena okuverwisa. Omayuva 3 kombunda yanao, eye wa zuva kutja kave zire komahi wokokure. Owo vaza kehi raKanaan. Josua otja pura Ovagibeon na tja: ‘Omena ratjike tjimwe tu wovisa?’ Owo va zira nave tja: ‘Eṱe aatu mu tira tjinene! Eṱe matu tjiwa kutja Jehova Mukuru weṋu me mu rwire, arikanaye amu tu zepa.’ Josua wa yenenisa omakwizikiro we nehe ve zepa.

Kombunda yanao, ozombara zaKanaan 5 novarwe vazo vovita va tya okurwisa Ovagibeon. Josua novarwe ve vovita va nḓerera  ouṱuku auhe okuveyama. Otjirwa tja uta rukuru omuhuka omunene mbwa kongorera ko. Ovakanaan va uta okutupuka ominda avihe. Koṋa akuhe kaave tupuka Jehova wa rokisa ozombawe zombura ozonene kombanda yawo. Tjazumbo Josua wa ningira Jehova okutjita kutja eyuva ri hirimane. Ongwaye eye tja ningira Jehova okutjita nao, tjinangara eyuva kari ya rora okuhirimana? Mena rokutja Josua wa ri nongamburiro mu Jehova. Eyuva karina pu ra hita oure weyuva arihe nga Ovaisrael tji va taara ozombara zaKanaan novarwe vazo.